प्रकाशमानलाई कांग्रेसले दिएन टिकट
नेपाली कांग्रेसले पूर्व उपप्रधानमन्त्री तथा पूर्व महामन्त्री प्रकाशमान सिंहलाई यस पटक टिकटबाट वञ्चित गरेको छ । २०६४ देखि लगातार सबै चुनाव काठमाडौंबाट जित्दै आएका प्रकाशमानलाई सभापति गगन थापाले ७ नम्बरमा जान भनेका थिए ।
तर प्रकाशमानले क्षेत्र नम्बर १ नछाडेपछि उनले टिकट पाएनन् । उनको ठाउँमा प्रबल थापाले टिकट पाएका छन् । उनी सभापति गगन थापानिकट हुन् । थापा सर्वोच्च अदालतबाट पदमुक्त भएका अख्तियारका पूर्व प्रमुख आयुक्त लोकमान सिंह कार्कीका छोरी ज्वाइँ हुन् ।
उनीमाथि २०७३ मा सर्वोच्चले लोकमानविरुद्धको मुद्दामा म्याद तामेल गर्ने सन्दर्भमा बाधा अवरोध र असहयोग गरेको आरोपमा १ हजार रुपैयाँ जरिवाना समेत गरेको थियो ।
उनीसहित तामेलदार शम्भुबहादुर खत्री, काठमाडौं महानगरपालिका वडा नम्बर १० की तत्कालीन सचिव सरिता राई र सई नकुलराज गौतमलाई १ हजार रुपैयाँका दरले जरिवाना गरेको थियो ।
