म्यादी प्रहरीले कति पाउँछन् तलब र सुविधा
नेपाल प्रहरीले प्रतिनिधिसभा सदस्य निर्वाचनका लागि १ लाख ३३ हजार ९८० जना म्यादी प्रहरी भर्ना गर्ने भएको छ । पुस २५ देखि माघ १ गतेसम्म देशभरका ७७ जिल्ला प्रहरी कार्यालयमार्फत दरखास्त दिन सकिने छ ।
आवेदक १८ वर्ष पूरा भई ५४ वर्ष ननाघेको, नेपाली नागरिक, सामान्य लेखपढ गर्न जान्ने, कुनै फौजदारी मुद्दामा सजाय नपाएको र कुनै राजनीतिक दलको सदस्य नभएको हुनुपर्नेछ । शारीरिक तथा मानसिक रूपमा स्वस्थ व्यक्ति मात्र छनोट हुनेछन् ।
म्यादी प्रहरीलाई नेपाल प्रहरी जवानको प्रारम्भिक तलब सरह प्रतिदिन ८६९ रुपैयाँ ४० पैसाका दरले ४० दिनको करिब ३४ हजार ७७६ रुपैयाँ उपलब्ध गराइनेछ । यसका साथै खाद्यान्न खर्च, तयारी खर्च, खाजा खर्च र पोसाक भत्तासमेत छुट्टै दिइनेछ ।
प्रारम्भिक छनोट माघ ५ देखि ९ गतेसम्म गरिनेछ भने अन्तिम नतिजा माघ १२ गते सार्वजनिक हुनेछ । छनोट भएकालाई माघ १५ देखि २४ गतेसम्म तालिम दिइने कार्यतालिका रहेको छ ।
