लुम्बिनीबाट कांग्रेस-एमाले उमेदवारको मनोनयन दर्ता
माघ ११ गते हुने राष्ट्रिय सभा निर्वाचनका लागि कांग्रेस-एमाले गठबन्धनका ३ जनाले उमेदवारी दर्ता गराएका छन् । तालमेलअनुसार एमालेकी रामकुमारी झाँक्री, नेपाली कांग्रेसका वासुदेव जंगली र चन्द्र केसीले मनोनयन दर्ता गरेका हुन् । झाँक्री महिला क्लस्टरबाट, जंगली अपाङ्गता क्लस्टरबाट र केसीले अन्य क्लस्टरबाट मनोनयन दर्ता गराएका छन् ।
झाँक्रीको प्रस्तावकमा घोराही उपमहानगरपालिकाका नगर प्रमुख नरुलाल चौधरी र समर्थकमा उपप्रमुख हुमाकुमारी डिसी रहेका छन् । जंगलीको प्रस्तावकमा बबई गाउँपालिकाका अध्यक्ष कुलबहादुर खत्री र समर्थकमा बंगलाचुली गाउँपालिकाका उपाध्यक्ष भक्तबहादुर जिसी छन् ।
केसीको प्रस्तावकमा दंगिशरण गाउँपालिकाका अध्यक्ष शम्भु गिरी र समर्थकमा शान्तिनगर गाउँपालिकाका अध्यक्ष प्रमोद बस्नेत छन् ।
प्रदेशमा कुल मतभार ८,७५३ रहेको छ । जसमा कांग्रेसको ३,१७९, एमालेको २,८१० र माओवादी–एकीकृत समाजवादी गठबन्धनको २,६८६ मतभार छ । केन्द्रमा सहमति नभएपछि लुम्बिनी प्रदेशमा समेत नेपाली कम्युनिष्ट पार्टीले अलग्यै उम्मेदारी दर्ता गरेका छन् ।
