दैलेख–२ मा उम्मेदवार छनोट, विष्णु रिजाललाई सर्वाधिक मत
दैलेख निर्वाचन क्षेत्र नं. २ मा नेकपा एमालेबाट युवा नेता विष्णु रिजाल प्रतिनिधि सभा सदस्यका लागि उम्मेदवार सिफारिस हुनु भएको छ । शनिबार दैलेखको जम्बुकाँधमा सम्पन्न उम्मेदवार छनोटसम्बन्धी आन्तरिक चुनावी प्रतिस्पर्धामा सर्वाधिक मत प्राप्त गर्दै उहाँ आगामी फागुन २१ गते हुने प्रतिनिधि सभा निर्वाचनका लागि सिफारिस हुनु भएको हो ।
उम्मेदवार छनोटका लागि भएको प्रतिस्पर्धामा विष्णु रिजालसहित पूर्वसांसद लक्ष्मीप्रसाद पोखरेल, राजबहादुर बुढा र राजबहादुर शाही आकाङ्क्षी रहनु भएको थियो । निर्वाचन प्रक्रियाबाट गरिएको मतदानमा रिजालले ६७ मत प्राप्त गर्नु भयो । उहाँ नेकपा एमालेको केन्द्रीय सदस्य समेत हुनुहुन्छ ।
चुनावी प्रतिस्पर्धामा पूर्वसांसद लक्ष्मीप्रसाद पोखरेलले ६६ मत, राजबहादुर शाहीले ६१ मत र राजबहादुर बुढाले ५० मत प्राप्त गर्नु भएको छ ।
आकाङ्क्षीहरूबीच प्रतिस्पर्धा भए पनि प्रक्रिया शान्तिपूर्ण र लोकतान्त्रिक ढंगले सम्पन्न भएको थियो । सर्वाधिक मतसहित विष्णु रिजाल सिफारिस हुनु पार्टीभित्र उहाँप्रतिको भरोसा र संगठनात्मक स्वीकार्यताको संकेतका रूपमा हेरिएको छ । अब क्षेत्रीय तहको सिफारिस पार्टीको केन्द्रीय समितिमा पठाइने र अन्तिम निर्णय केन्द्रबाट हुने छ ।
