सशस्त्र प्रहरीको गोलीबाट सफारी चालकको मृत्यु, लौकही बजार तनावग्रस्त
सुनसरीको कोशी गाँउपालिकमा सशस्त्र प्रहरीले चलाएको गोली लागेर सफारी चालक विजय साहको मृत्यु भएपछि स्थानीयले पूर्व पश्चिम सडक बन्द गराएका छन् । मृतक साहको शव सडकमा राखेर स्थानीयले प्रदर्शन गर्दा पूर्व पश्चिम सडक खण्ड हुँदै चल्ने सवारीका साधन चल्न सकेका छैनन् । सुनसरीको लौकही खण्डमा सयौ सवारीका साधन बाटैमा अलपत्र परेका छन् । स्थानीयले घटनाको उच्च स्तरीय छानबिन हुनु पर्ने माग राखेका छन् ।
आक्रोशित स्थानीयले सशस्त्र प्रहरीको व्यारेकमा ढुङ्गा मुढा गरिरहेका छन् । यस्तै उनीहरुले प्रहरीको विटमा समेत आगजनी गरेका छन् । लौकही बजार अहिले तनावग्रस्त भएको छ । स्थितिलाई नियन्त्रण लिन प्रहरीले केही राउण्ड अश्रुग्याँस प्रहार गरेको छ । घटनामा संलग्न रहेको भन्दै प्रहरीले सशस्त्र प्रहरीका हवल्दारलाई नियन्त्रणमा लिएका जनाएको छ । सुनसरीका प्रमुख जिल्ला अधिकारी वासुदेव घिमिरेले वार्ताको प्रयास समेत भइरहेको बताए ।
