क्रिकेटर मिनष थापाको दुर्घटनामा मृत्यु
मोटरसाइकल दुर्घटना हुँदा क्रिकेटर मिनष थापाको मृत्यु भएको छ । विराटनगर निवासी २७ वर्षीय थापाको बिहीबार बिहान भएको दुर्घटनामा मृत्यु भएको हो । विराटनगर–४ स्थित भित्री सडक खण्डमा भएको दुर्घटनामा गम्भीर घाइते भएका थापालाई उपचारका लागि कोशी अस्पताल पुर्याइए पनि चिकित्सकले मृत घोषित गरेका थिए ।
थापाले चलाएको प्रदेश १–०२–०४२ प ८००२ नम्बरको मोटरसाइकल अनियन्त्रित भई दुर्घटना भएको प्रहरीको प्रारम्भिक अनुमान छ । थापाको असामयिक निधनले घरपरिवारसँगै नेपाली क्रिकेटप्रेमी शोकमा डुबेका छन् ।
थापाको निधनप्रति नेपाल क्रिकेट संघ (क्यान)का सचिव पारस खड्काले गहिरो दुःख व्यक्त गरेका छन् । उनले सामाजिक सञ्जालमार्फत शोक व्यक्त गर्दै थापालाई कोशी प्रदेशको एक ‘कुशल तथा अत्यन्त प्रतिभाशाली’ खेलाडीको रूपमा स्मरण गरेका छन् ।
