यस्तो बन्दै छ एमालेको नेशनल भोलेन्टियर फोर्स
नेकपा एमालेले पार्टी, नेतृत्व, जनता र देशको सुरक्षाका लागि नयाँ फोर्स बनाउने भएको छ । सो फोर्सकाे नाम ‘नेशनल भोलेन्टियर फोर्स’ रहने पार्टी स्थायी कमिटी सदस्य तथा जनसंगठन संयन्त्र प्रमुख भानुभक्त ढकालले जानकारी दिनुभयो । ‘नेशनल भोलेन्टियर फोर्स’लाई राष्ट्र, राज्य र संगठनकाे आवश्यकताका आधारमा परिचालन गरिने व्यवस्थित संरचनाका रूपमा विकास गर्न लागिएको उहाँले बताउनुभयो ।
राष्ट्रिय युवा संघ नेपाल, वाग्मती प्रदेशद्वारा सोमबार काठमाडौंमा आयोजित ‘युवा जागरण अभियान’ कार्यक्रममा सम्बोधन गर्दै उहाँले फोर्सको संरचना, नेतृत्व र परिचालनसम्बन्धी स्पष्ट प्रारूप तय भइसकेको जानकारी दिनुभयो ।
उहाँका अनुसार नेशनल भोलेन्टियर फोर्स केन्द्रीय कमाण्डका आधारमा सञ्चालन हुनेछ । पाँच सदस्यीय ‘हाइकमाण्ड’मार्फत निर्देशन र व्यवस्थापन गरिने र आवश्यकताअनुसार टोल–टोलमा समेत सोही मार्फत ‘सुरक्षा समिति’ गठन गरिने तयारी भइरहेको उहाँले बताउनुभयो । उहाँले भन्नुभयो, नेशनल भोलेन्टियर फोर्सले नीतिको नेतृत्व, राष्ट्रको सुरक्षा र राज्यका अप्ठेरा क्षणमा समेत भूमिकाको जिम्मेवारी वहन गर्नेछ, यसलाई व्यवस्थित रूपमा परिचालन गर्न हाइकमाण्ड प्रणाली लागू हुन्छ ।
ढकालले पार्टीका सबै तहबाट सिफारिसका आधारमा एकीकृत संरचना बनाउने तयारी भइरहेको बताउनुभयो । पार्टी जिल्ला कमिटीको सिफारिसमा प्रत्येक जिल्लाबाट एक–एक जना, प्रदेशबाट दुई–दुई जना तथा क्षमता र सक्रियताका आधारमा अन्य सदस्य समेटेर झन्डै २ सय २५ सदस्यीय केन्द्रीय कमाण्ड गठन गर्ने प्रक्रिया अघि बढाइको उहाँले जानकारी दिनुभयो ।
स्थानीय तहसम्म पनि सुरक्षा संरचना विस्तार गरिने उल्लेख गर्दै उहाँले कामको मूल्याङ्कन र क्षमताको आधारमा नेतृत्व चयन गरिने तथा पार्टी नेतृत्वको परामर्शमा जिम्मेवारी तोकिने बताउनुभयो ।
फोर्सको औपचारिक घोषणा मंसिर ५ गते गर्ने तयारी रहेको ढकालको भनाइ छ । उहाँका अनुसार यो संरचना राजनीतिक गतिविधिमा मात्र सीमित नभई राज्यलाई अप्ठेरो परेको बेला समेत सहयोग र सुरक्षा प्रदान प्रकृतिको हुने उहाँले बताउनुभयो ।
