शीर्ष नेताको घरमा एकाध करोड हुनु सामान्य : प्रचण्ड

हाम्रो इकोनोमि

 

 

नेपाली कम्युनिष्ट पार्टीका संयोजक पुष्पकमल दाहाल प्रचण्डले जेनजी आन्दोलनमा आगजनी भएको आफ्नो घरबाट एक लाख नगद मात्रै भेटिएको दावी गरेका छन् । आफूले घरमा खासै पैसा राख्ने नगरेको उनको भनाइ छ ।

एक टेलिभिजनमा अन्तरवार्ता दिँदै प्रचण्डले आफूले सुरक्षाका खातिर १०–५ लाख रुपैयाँ गरेर साथीभाइको घरमा राख्न दिने गरेको खुलासा समेत गरे । 

 

प्रस्तोताः तपाईंको मुखबाट सुन्न चाहेको एउटा जवाफ छ । तपाईंले त्यति धेरै पैसा घरमा किन राख्नुभएको ?

 

प्रस्तोता : भनेपछि तपाईंको पनि एआइकै पैसा हो कि क्या हो ?

एआइ हो कि के हो । अरुको घरमा देखिएको पैसा प्रचण्डकोमा देखिएको भनेर प्रचार भयो । प्रचण्डकोमा देखिएको भनेको जम्मा एक लाख रुपैयाँ हो । पत्रकारले गएर, हेरेर सबै छानविन गर्दा देखिएको भनेको एक लाख हो । कुरा बुझ्नुभो त ।

प्रचण्ड (हाँस्दै) : थाहा पाएँ । त्यसको खण्डनमा पनि सचिवालयबाट विज्ञप्ति आइसकेको छ । सावित गर भनेर चुनौति दिइएको छ । त्यो १०० प्रतिशत झूटो थियो । सबै हेर्दा कहीँ न कहीँ निकै ठूलो षडयन्त्र छ जस्तो लाग्छ नेपालका पार्टी र नेताहरुविरुद्ध । प्रहरीको पूर्वअफिसरले यति ठूलो प्रचार गर्ने र सेन्सेसन फैलाउने काम गरे । म राति १० बजेसम्म खुमलटारमा मिटिङमा छु । सबै नेताहरु त्यहाँ जम्मा छन् । ११ बजे बेडमा गएको छु । आरामसँग सुतेको छु । केको ट्रकमा लाने ? हावा कुरा ।

 

प्रस्तोताः यति ठूलो पार्टी सञ्चालन गरिरहनुभएको छ, देशैभरि संगठन छ, कार्यकर्ताको व्यवस्थापन गर्नुपर्छ । घरमा कहिले बिरामीको उपचार गर्नुपर्छ । कार्यकर्ताको भिड लागेको हुन्छ । चन्दा पनि बैंकिङ च्यानलबाट त्यति धेरै आउँदैन । पार्टीको कोष सञ्चालनमा अध्यक्ष नै पावरफुल हुनुहुन्छ । त्यसैले शीर्ष नेताको घरमा एकाध करोड हुनु ठूलो त होइन नि ?

(घुमाउरो तरिकाले गरिएको यो प्रश्नले प्रचण्डलाई सत्य ओकल्न वाध्य पार्यो । उनले आश्चर्यजनक स्वीकारोक्तिसहित यस्तो जवाफ दिए )
त्यो ठूलो कुरा होइन (एकाध करोड) हुन सक्छ । तर मैले घरमा पैसा राख्दैनथेँ । साथीहरुकैमा राखिदिन्थेँ । अलिअलि गरेर, बरु १० लाख, ५ लाख, ४ लाख गरेर विभिन्न ठाउँमा राख्दा सुरक्षित पनि हुन्छ र सजिलो पनि हुन्छ भनेर । फेरि पार्टीभित्र के हो भनेर प्रश्न पनि उठ्दैन । विभिन्न ठाउँमा राखेको छ थाहा छ साथीहरुलाई पनि ।

 

प्रस्तोताः त्यस्तो पारदर्शी हुन्छ ?

प्रचण्डः एउटा लेभलसम्म त पारदर्शी हुन्छ नि त । नभए चल्दै चल्दैन ।

 

प्रस्तोताः भनेपछि बाँकी १ लाख मात्रै देखियो पैसा ?

प्रचण्डः त्यहाँ त्यही भन्या छन् । मलाई त त्यो पनि के थाहा ।

 

प्रस्तोताः तपाईंकी छोरी गंगा दाहालको घरमा एउटा शव भेटियो र शवले पैसाको झोला नै समाएको झोला नै भेटिएको भनेर निकै हल्ला चलेको छ, त्यसको सत्यता के हो ?

प्रचण्डः त्यसको अनुसन्धान भइरहेको छ । हामीले र गंगाले राज्यलाई सक्ने सहयोग गरिराखेका छौं । त्यो के हो भन्ने अनुसन्धान भएर पुष्टि त भएको छैन । केही पैसा थियो होला त्यहाँ भन्छु मैले । पैसा त पक्कै थियो होला । अघि भनेँ नि प्रतिकात्मकरुपमा, पैसा मसित भए नि कोही यहाँ कोही त्यहाँ राख्ने सन्दर्भमा त्यहाँ पनि पुग्यो होला । मैले सोध्या त छैन यसरी ।