अझै पाँचहजार कैदी फरार
गृहमन्त्री ओमप्रकाश अर्यालले गत भदौ २३ र २४ को घटनामा देशका विभिन्न कारागारबाट फरार भएकामध्ये पाँच हजार १३ कैदीबन्दी अझै फरार रहेको बताएका छन् ।
राष्ट्रियसभाअन्तर्गतको संघीयता सबलीकरण तथा राष्ट्रिय सरोकार समितिको आजको बैठकमा उनले फरार कैदीबन्दी र लुटिएका हतियारलाई सरकारले प्रमुख सुरक्षा चुनौतीका रूपमा लिएको बताए ।
गृहमन्त्री अर्यालका अनुसार, त्यस क्रममा कुल १४ हजार ५५४ कैदीबन्दी फरार भएकामा हालसम्म नौ हजार ५४१ जनालाई नियन्त्रणमा लिइसकिएको छ ।
उनले फरार कैदी पक्राउ गर्न विशेष अपरेसन चलाइएको जानकारी दिए । “फरार कैदीहरूको सूची सार्वजनिक गरिएको छ,“ उनले भने, “त्यस्ता फरार कैदीहरू सार्वजनिक निकायमा सेवा लिन आएमा सेवा प्रदान नगर्न सबै निकायहरूमा पत्राचार गरिएको छ ।
उनले खोजतलासलाई तीव्रता दिन सबै जिल्ला प्रशासन कार्यालयहरूमा सहायक प्रमुख जिल्ला अधिकारीको संयोजकत्वमा कार्यदल गठन गरिएको पनि बताए ।
सरकार सबै चुनौतीलाई परास्त गरी स्वच्छ, निष्पक्ष र भयरहित वातावरणमा निर्वाचन सम्पन्न गराउन विश्वस्त रहेको मन्त्री अर्याल बताउँछन् । “सरकार गम्भीरतापूर्वक अघि बढेको छ,“ उनले भने, “यसमा सर्वसाधारण सबैको साथ, सहयोग र सहकार्य अपरिहार्य रहेको व्यहोरासमेत अनुरोध छ ।
