विश्व कीर्तिमानी फुर्वा तेन्जिङ शेर्पा हिम पहिरोमा बेपत्ता
दोलखाको रोल्वालिङ हिमश्रृङखलाको ‘यलुङ री’ हिमालमा आएको हिम पहिरोमा पुरिएर सगरमाथाको सफल आरोहण गरिसकेका फुर्वा तेन्जिङ शेर्पा बेपत्ता छन् ।
१५ पटक सगरमाथाको सफल आरोहण गरिसकेका दोलखाको गौरीशंकर गाउँपालिका–९ बेदिङका फुर्वा तेन्जिङ शेर्पा बेपत्ता भएको जिल्ला प्रहरी प्रमुख डीएसपी ज्ञानकुमार महत्तोले जानकारी दिए ।
फुर्वा तेन्जिङ २४ वर्षको उमेरमै ९ पटक सगरमाथा आरोहण गरेर विश्व कीर्तिमान कायम गरी गिनिज बुकमा नाम लेखिसकेका विख्यात आरोही हुन् ।
ड्रिम्स डेस्टिनेसन ट्रेक्स एण्ड एक्सपिडिसन कम्पनीको व्यवस्थापनमा डोल्मा खाङ हिमाल र आरोहणका लागि तीन विदेशी आरोही र ५ जना नेपाली टुरिष्ट गाइडसहित ८ जना र स्थानीय गाइड समेत १४ जना यलुङ री बेस क्याम्प पुगेको थियो ।
हिमाल आरोहणको अनुमति लिने तर स्थानीय प्रशासनमा समेत त्यसको विवरण नहुने भएकाले आरोहीहरुको पहिचान र विस्तृत विवरण खुल्न कठिन भएको हो ।
घटनास्थलतर्फ नेपाली सेना, सशस्त्र प्रहरी र नेपाल प्रहरीको संयुक्त सुरक्षा फौज परिचालन गरिएको जिल्ला प्रशासन कार्यालय दोलखाले जनाएको छ । लामा बगरको गोंगरबाट खटिएको करिवब ५० जनाको सुरक्षा टोली ना गाउँ गइरहेको जिल्ला प्रहरी कार्यालय दोलखाले जनाएको छ ।
खराब मौसमका कारण सोमबार दिनभर हेलिकोप्टर परिचालन भए पनि रात परेका कारण उद्धारको काम हुन सकेको थिएन ।
मंगलबार बिहान ४ जना घाइतेको हेलिकप्टरमार्फ़त उद्धार भएको दोलखा प्रहरीले जनाएको छ । चार जना मध्ये २ जना नेपाली र २ जना विदेशी छन । उद्धार भएका बिरामीको नाम खुलेको छैन ।
प्रहरीका अनुसार हिमाल आरोहणका लागि गएका ७ विदेशी सहित १४ जनाको समूहमध्ये ३ जनाको मृत्यु भएको छ भने ७ जना बेपत्ता छन् । बाँकी ४ जनाको हेलिकप्टर मार्फ़त उद्धार भएको छ ।
