विद्याले अध्यक्ष बन्छु भन्दै हिँडेकाले समस्या भयो : शेरधन
नेकपा एमालेका स्थायी कमिटी सदस्य एवं कोशी अञ्चल इन्चार्जले पूर्वराष्ट्रपति विद्यादेवी भण्डारीको सदस्यताबारेको बहस भावनाले नहुने बताएका छन् । पार्टी जिल्ला कमिटीको शनिबारको बैठकमा भण्डारीको सदस्यता रोक्ने निर्णयले तलसम्म असर परेको कुरा उठेपछि राईले पार्टीले निर्णय गरिसकेको विषयमा कोही दायाबायाँ गर्न नमिल्ने बताए । भोजपुरमा जन्मिएकी भण्डारीको राजनीतिक सुरूवात यहीँबाट भएको थियो । भोजपुर शेरधनको पनि गृहजिल्ला हो ।
राईले जिल्लाकै हिसाबले पनि आफ्नो दिदीभाइको सम्बन्ध रहेको ५६ सालदेखि आफ्नो राजनीतिक जीवनमा सहयोग पनि गरेको सम्झिँदै सधैँ आफूले सम्मान गर्ने तर, राजनीतिक कुरा र पार्टीको निर्णयबाहिर जान नसक्ने प्रष्ट पारेका छन् ।
कोशीको संस्थापक मुख्यमन्त्रीसमेत रहेका शेरधनलाई तत्कालीन प्रधानमन्त्री केपी ओलीको पालामा अर्कैले दौरा-सुरूवाल सिलाइसकेका बेला विद्याले त्यसबेला अडान लिएपछि सञ्चारमन्त्रीको शपथ गराइएको एमालेका जानकार नेताहरूले चर्चा गर्दै आएका छन् । एमालेमा फर्किने कुरा आएपछि भण्डारीसँग आफू ३/४ घण्टा छलफल गरेर नेतासँग कुरा गराउन सहजीकरण गरेपनि पद्धतिभित्र नआएको उनको भनाइ थियो । भण्डारीले आफ्ना विचार/आकांक्षा र सोचलाई विधि पद्धतिविपरीत सार्वजनिक ठाउँमा बोलेको उनको टिप्पणी थियो ।
एमालेको अध्यक्षकै निम्ति आउँदैछु भनेर मिडियाबाट बोलेको भन्दै राईले भने, उहाँ पूर्वराष्ट्रपतिको हैसियतमा रहनुभएको थियो । जहाँसम्म उहाँको सदस्यता नवीकरणको कुरा उहाँ पार्टीको नेता कार्यकर्ता पनि हुनु भएको हुनाले र सधैँ एमालेको हित र उन्नतिमा साथ दिने गार्जेन पनि भएकाले त्यसबाटोबाट आफ्ना विचार/आकांक्षा र सोचलाई त्यताबाट ल्याउनुपर्थ्यो । तर, त्योरूपमा विषय आएन । सार्वजनिक कार्यक्रममा सक्रिय राजनीतिमा आउँदैछु भन्नुभयो । र, म पार्टी अध्यक्षकै निम्ति आउँदैछु भनेर भित्रबाट हैन बाहिर मिडियाबाट आउनुभयो । जुन कुरा पार्टीले अपेक्षा गरेको थिएन । त्यो पद्धतिभित्र पनि पर्दैनथ्यो । पार्टीको उपाध्यक्ष र सदस्यता त्यागेर राष्ट्रपति बनेको भन्दै उनले भण्डारीले दुवै कार्यकालमा असाध्यै राम्रो छविका साथ राम्रो उचाइबाट राष्ट्रको अभिभावकत्व निर्वाह गरेको बताउँदै सारा नेपालीले कदर गरेका छन् प्रशंसा गरेको र पार्टीले पनि कदर गरेको शेरधनको भनाइ छ ।
