१४ सांसद लिएर लामा काठमाडौंमा, बानियाँको विश्वासको मत धरापमा
बागमती प्रदेशका मुख्यमन्त्री इन्द्र बानियाँले आज प्रदेशसभामा विश्वासको मत लिँदैछन् । उनले अपराह्न ४:०० बजे बस्ने प्रदेशसभाको बैठकमा विश्वासको मत लिने कार्यसूची छ ।
तर, निवर्तमान मुख्यमन्त्री बहादुर लामा पक्षले आफ्नो अडान नछाड्दा मुख्यमन्त्री बानियाँ अप्ठ्यारोमा परेका छन् । लामासहित कांग्रेसका १४ सांसद यतिबेला काठमाडौंमै छन् । लामाले आफू मुख्यमन्त्री हुँदा नियुक्त गरेको तीन मन्त्रीलाई शपथ गराउनुपर्ने अडान राखेका छन् । यसअघि पार्टी सभापति शेरबहादुर देउवासहित बसेको बैठकमा बानियाँले तीन मन्त्रीको शपथ गराउने बताएपछि लामाले राजीनामा दिएका थिए । तर, बानियाँले सहमति कार्यान्वयन नगरेपछि लामा समूह रुष्ट छ ।
लामाले साउन १४ गते गोविन्द लम्साल, माया श्रेष्ठ र गीता गुरुङलाई मन्त्री नियुक्त गरेका थिए । लामाले लम्साललाई आन्तरिक मामिला तथा कानून मन्त्रालय, श्रेष्ठलाई युवा तथा खेलकुद मन्त्रालय र गुरुङलाई सहकारी तथा गरिबी निवारण मन्त्रालयको जिम्मेवारी दिएका थिए ।
बानियाँले सहमति लत्त्याएको भन्दै सभापति देउवाको निर्देशन समेत नमानी लामा समूह अहिलेसम्म काठमाडौंमै छ । मुख्यमन्त्रीले विश्वासको मत लिने कार्यक्रम भए पनि आफूहरू काठमाडौंमा रहेको लामा समूहका सांसद गोविन्द लम्सालले बताए । उनले भने हामी अहिलेसम्म काठमाडौंमै छौँ । पार्टी सभापति देउवासँग सम्पर्क भइरहेको छ । हामीले कुराकानी गरिरहेका छौँ ।
तपाईँहरूले काठमाडौं बसेर विश्वासको मत लिने मिति सार्न प्रस्ताव गर्नुभएको हो, भन्ने जिज्ञासा उनले भने, हामी अहिलेसम्म काठमाडौंमै छौँ भनेपछि आफैँ बुझ्नुस् न । हाम्रो माग सबै तपाईंहरुलाई थाहा छँदैछ ।
कांग्रेस र एमालेका ६४ जना प्रदेशसभा सदस्यको समर्थनमा कांग्रेस बागमती प्रदेशका सभापतिसमेत रहेका बानियाँ यही साउन २० गते मुख्यमन्त्रीमा नियुक्त भएका थिए । कांग्रेस र एमालेले मुख्यमन्त्री इन्द्रबहादुर बानियाँलाई विश्वासको मत दिन ह्वीप जारी गरेका छन् । लामा पक्षले यसअघि नै सभापति देउवालाई नै भेटेर आफ्नो माग सम्बोधन नभए सामूहिक राजीनामा दिनेसम्मको चेतावनीसमेत दिइसकेका छन् ।
