नेपाललाई पार्टी अध्यक्ष छोड्न खनालको चेतावनी
एकअर्काविरुद्ध चर्को सार्वजनिक अभिव्यक्ति दिइरहेका नेकपा एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनालबीच एक घण्टा लामो सम्वाद भएको छ ।
एकअर्कालाई पार्टी छोड्न सुझाव दिने तहकै आरोप–प्रत्यारोपमा नेपाल र खनाल उत्रिएपछि दोस्रो तहका नेताहरुले छलफलमा राखेका हुन् । नेताहरु बेदुराम भुसाल र प्रमेश हमाल, वरिष्ठ उपाध्यक्ष राजेन्द्र पाण्डे र महासचिव घनश्याम भूसालले दुई नेतालाई छलफलमा राखेका थिए ।
माधव नेपालले ‘विद्रोह पुष्टि गर्न सकिएन भन्ने अभिव्यक्ति दिनेलाई पार्टीबाट बिदा गरिने’ बताएका थिए । यो छलफलमा अध्यक्ष नेपालले आफ्नो आसय पार्टी छोडेर हिँड्नु भन्ने नभएको बताएका थिए । दुवै जनाले आफ्नो आसय प्रष्ट्याउन खोज्नुभयो । तर कुनै ठोस निष्कर्षमा पुगिसकेको भने होइन’ स्रोतले भन्यो । पूर्वप्रधानमन्त्री खनालले लिएको अडानले छलफल निष्कर्षमा नपुगेको स्रोत बताउँछ ।
झलनाथ खनालले अडान छोड्नु भएन । उहाँले पार्टी छोडेर जानुपर्छ भन्ने माधव नेपालको भनाइसँगै समग्र राजनीतिक कोर्सकै निकास दिनुपर्ने अडान लिनुभयो’ स्रोत भन्छ ।
माधव नेपालले मार्गप्रशस्त गर्नुपर्ने प्रस्ताव खनालले राखेका थिए । यस्तो केसमा मार्ग प्रशस्त गर्नु तपाईंकै हितमा हुन्छ’ खनालको भनाइ थियो । पतञ्जली जग्गा प्रकरणमा माधव नेपालको व्यक्तिगत मुद्दा भएकाले पनि मार्ग प्रशस्त आवश्यक रहेको खनालले तर्क गरेका थिए ।
‘अदालतमा मुद्दा चलिरहेको छ । यस्तोमा तपाईंले कसैलाई कार्यवाहक दिनुस्’ पूर्वप्रधानमन्त्री खनालले भनेका थिए । एक नेताका अनुसार पूर्वप्रधानमन्त्री खनालको अडानले छलफललाई अगाडि बढ्न दिएन ।
