बहादुरसिंह लामाको मुख्यमन्त्री पद धरापमा
संसदीय दलको नेता हुँदै बागमती प्रदेशको मुख्यमन्त्री हुने लाइनमा रहेका नेपाली कांग्रेस बागमती प्रदेशका सभापति इन्द्र बानियाँको पक्षमा २३ सांसदहरूले साथ दिने निश्चित भएको छ ।
हालका संसदीय दलका नेता बहादुरसिंह लामाको विपक्षमा यस अघि २१ सांसदको हस्ताक्षर सहित बानियाँले संसदीय दलमा अविश्वासको प्रस्ताव दर्ता गरेका थिए । अविश्वास प्रस्तावमा हस्ताक्षर रहेका कांग्रेसका प्रदेश सांसदहरू मिना पराजुली र माया श्रेष्ठले आफूहरूको असहमतिकाबीचमा हस्ताक्षर गराइएको भन्दै आफुहरु लामाकै पक्षमा रहेको विज्ञप्ति मार्फत सार्वजनिक गरिसकेका छन् । तर बानियाँले भने आफ्नो पक्षमा २३ सांसदहरू रहेको दाबी गर्दै आएका छन् । तर दुई सांसदको विज्ञप्ति संसदीय दलमा दर्ता नभएको संसदीय दलका सचिव कृष्ण तामाङले बताए ।
कांग्रेसका २३ सांसदलाई बानियाँ समूहले रातभर हेटौँडाको एउटा होटेलमा सँगै राखेका छन् । २३ जना सांसद हामीसँगै हुनुहुन्छ, रातभर हामीसँगै छौ अहिले १० बजेट संसदीय दलको कार्यालयमा सँगै जान्छौँ’ कांग्रेस बागमतीका एक पदाधिकारीले भने ।
सांसदहरू यता उता हुन सक्ने भएले कांग्रेस सभापति बानियाँले २३ सांसदलाई राती सँगै राखेका हुन् । ‘हस्ताक्षर गर्ने सांसदहरु यता उता हुन सक्छन् तर बानियाँको पक्षमा २३ मत पक्का भएको छ ती पदाधिकारीले भने, २३ भएन भने पनि लामाको भन्दा बढी मत आउँछ । लामा पनि आफ्नो पक्षमा बढी सांसद बनाउन अधिकतम प्रयास गरिरहेका छन् । बानियाँ र लामा दुवैले सांसदहरूलाई मन्त्री बनाउने आश्वासन दिएर सांसदहरूलाई आफ्नो पक्षमा पार्ने अधिकतम प्रयास गरेको कांग्रेस स्रोतको दाबी छ ।
