एमालेको बिधान महाधिवेशनमा विद्यालाई ढोका बन्द
१४ असारमा पूर्वराष्ट्रपति विद्या भण्डारीले एमालेको सक्रिय सदस्यता नवीकरण गरेको र एमालेको सदस्य भएको घोषणा गरेपछि एमालेभित्रको राजनीति तरंगित बनेको छ । एमालेको नेतृत्व गर्ने मनसायका साथ भण्डारीले पार्टी सदस्यता नवीकरण गरेपछि पक्ष विपक्षमा मत विभाजित भएको छ ।
यसैबीच आगामी भदौ २०-२२ मा नेकपा एमालेको बिधान महाधिवेशन हुदैछ । तर यो महाधिवेशनमा भण्डारी प्रतिनिधिका रुपमा सहभागी हुन नमिल्ने देखिएको छ । आसन्न विधान महाधिवेशनमा १० औँ महाधिवेशनका प्रतिनिधिमात्रै सहभागी हुने परिभाषित व्यवस्था भएकाले मनोनीत गर्ने अवस्था नरहेको बताइन्छ । यो व्यवस्थाले पार्टी सदस्यता नवीकरण गरेका पूर्वराष्ट्रपति भण्डारीलाई बिधान महाधिवेशनमा प्रतिनिधिका हैसियतले सहभागी हुने बाटो बन्द रहेको प्रष्ट भएको छ ।
भण्डारी नेपालको पहिलो महिला राष्ट्रपति हुन् । दुई कार्यकाल राष्ट्रपति हुने पनि उनी नै प्रथम नेपाली हुन् । अब उनी दलगत राजनीतिमा सक्रिय हुन खोज्दै छिन् । एमाले सदस्यता नवीकरण गरेको हप्ता दिनपछि उनले पूर्वराष्ट्रपतिको हैसियतले लिने सेवा सुविधा त्यागेको घोषणा गरेकी थिइन् ।
उनले पार्टीमा फर्किने संकेत दिन थालेदेखि नै प्रश्न उठ्दै आएको छ, ‘देशकै सर्वोच्च संवैधानिक पदमा पुगिसकेको व्यक्ति फेरि दलको झण्डा बोकेर मैदानमा आउनु कत्तिको उचित हो ?’ केहीअघिसम्म यो प्रश्न सञ्चारमाध्यम र नागरिकस्तरमा सीमित थियो । अब भने मुख्य ठूला दल कांग्रेस र एमालेभित्र पनि यसमाथि बहस सुरु भएको छ ।
