विद्या भण्डारीले एमालेको अध्यक्ष हुन्छु भन्नुभएको छैन : शेरधन
नेकपा एमालेको स्थायी समिति सदस्य एवं कोशी प्रदेशका इन्चार्ज शेरधन राईले विद्या भण्डारीले सक्रिय राजनीतिमा आउने चाहना व्यक्त नगरेको बताएका छन् । भण्डारीका सवालमा अनेक अनुमान गरेर मिडियामा समाचार आइरहेको भन्दै उनले आपत्ति प्रकट गरे । जसले एमालेमा अन्यौलता सृजना गरेको राईको भनाइ छ । आफू भण्डारीकै जिल्लाबासी र लामो समय सँगै राजनीति गरेकोले धेरै कुरामा भण्डारीसँग संवाद भइरहने भन्दै सक्रिय राजनीतिमा फर्कने आशय व्यक्त नगरेको उनको जिकिर थियो ।
नेकपा एमालेको स्थायी कमिटी सदस्य र उहाँसँग एक प्रकारले जिल्लाबासीको नाताले पनि पार्टीमा लामो समयसँगै काम गर्दै आएको हिसाबले हाम्रो संवाद हुने गर्छ । आजको मितिसम्म उहाँ सक्रिय राजनीतिमा फर्कने कुरा अझ नेकपा एमालेको अध्यक्ष बन्न आउँदैछु भन्ने कुरा उहाँले व्यक्त गरेको कुरा मैले र हामीले सुनेका छैनौँ ’ पूर्वमुख्यमन्त्री राईले भने ।
चौतारीको पत्रकार भेटघाटमा बोल्दै राईले केही दिन अगाडि उहाँको कोशी प्रदेश भ्रमणका क्रममा अनेक शंसय सृजना भएको बताए । आफूहरू पार्टीको जिम्मेवार पदमा रहेको र भण्डारी एमालेकै पूर्वउपाध्यक्ष र एमालेकै तर्फबाट राष्ट्रपतिसमेत भएकाले स्वागत गर्न जानु दायित्वभित्र पर्ने राईले प्रष्टीकरण दिए ।
राईले विद्यादेवी भण्डारी एमालेको राजनीतिमा फर्कँदै गरेको अथवा अध्यक्ष केपी शर्मा ओलीलाई प्रतिस्थापन गर्न लागेको भन्ने कुरामा सत्यता नभएको बताए । बजारमा अहिले यस प्रकारका हल्लाले ठाउँ पाएका छन् । तर, उहाँले यस्ता कुराहरू व्यक्त गर्नुभएको छैन’ उनले भने ।
