गणतन्त्र उत्सव मनाउँदै एमाले
प्रमुख सत्तारुढ दल नेकपा (एमाले)ले आज गणतन्त्र दिवसको अवसरमा भृकुटीमण्डपमा गणतन्त्र उत्सव मनाउँदैछ । भृकुटीमण्डपमा बिहान ११ बजेदेखि २ बजेसम्म गणतन्त्र उत्सव कार्यक्रम हुन लागेको हो ।
आइतबार बसेको एमालेको सचिवालय बैठकले गणतन्त्र दिवसको दिन सांस्कृतिक झाँकीसहित देशभर उत्सव मनाउने निर्णय गरेको थियो । सोही अनुसार आज एमालेले गणतन्त्र दिवसलाई उत्सवका रूपमा मनाउन काठमाडौं उपत्यकाको भृकुटीमण्डपमा र जिल्लाजिल्लामा पनि विशेष कार्यक्रम गर्दैछ ।
एमाले महासचिव शंकर पोखरेलले गणतन्त्र उत्सव कसैको विरोधमा नभएको बताए । महासचिव पोखरेलले जनताको उपलब्धिको खुशियाली प्रकट गर्न कार्यक्रम गर्न लागेको बताए । हामीले कसैको विरोधमा होइन जनताको उपलब्धिको खुशियाली प्रकट गर्ने उत्सवका रूपमा कार्यक्रम गर्न लागेका हौँ महासचिव पोखरेलले भने ।
