बाजुरामा गाडी दुर्घटना, तीन जनाको मृत्यु
बाजुराको विकट क्षेत्र जगन्नाथ गाउँपालिका–२ काँडाकोटमा मङ्गलवार भएको गाडी दुर्घटनामा नेपाल टेलिकम बाजुरा शाखा कार्यालय प्रमुखसहित तीन जनाको मृत्यु भएको छ भने दुई जना गम्भीर घाइते भएका छन् ।
पिलुचौरबाट काँडाकोटतर्फ जाँदै गर्दा बा ५ च २२०९ नम्बरको टेलिकमको जीप काँडाकोट नजिकै दुर्घटना भएको जिल्ला प्रहरी कार्यालय बाजुराले जानकारी दिएको छ । टावरमा ब्याट्री फेर्नका लागि ब्याट्री लिएर गएको जीप सडकबाट करिब ५ सय मिटर तल खसेर दुर्घटना भएको हो ।
दुर्घटनामा नेपाल टेलिकम बाजुरा शाखा कार्यालय प्रमुख लोक बहादुर खड्का, जीप चालक करन सिंह महता र सुरक्षा गार्ड रवीन्द्र धामीको घटनास्थलमै मृत्यु भएको जिल्ला प्रहरी कार्यालय बाजुराका प्रमुख प्रहरी नायव उपरीक्षक इकबाल हवारीले जानकारी दिए ।
दुर्घटनामा नन्दराम तिरुवा र लोकेन्द्र तिरुवा घाइते भएका छन् र उनीहरू दुवै जना बाजुरा बुढिनन्दा नगरपालिका–२, कोल्टीका बासिन्दा हुन् । घाइते दुवै जनालाई सुरुमा कोल्टी अस्पताल लगिएको थियो । तर अवस्था गम्भीर भएपछि सेनाको हेलिकोप्टरमार्फत नेपालगञ्ज मेडिकल कलेज रेफर गरिएको छ ।दुर्घटनाको थप अनुसन्धान भइरहेको जिल्ला प्रहरी कार्यालय बाजुराले जनाएको छ ।
