आफुविरुद्ध राज्य नै लागेको रवि लामिछानेको आरोप
राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नोविरुद्ध राज्य नै लागेको टिप्पणी गरेका छन् । मंगलबार सभामुख देवराज घिमिरेलाई भेटेर सांसद पद निलम्बन फुकुवाको माग गरेपछि पत्रकारहरूसँग कुरा गर्दै उनले यस्तो बताएका हुन् ।
पत्रकारले लामिछानेलाई सभामुखले सांसद पदबाट निलम्बन फुकुवा नगरे अदालत जाने हो भनेर सोधेका थिए । जवाफमा उनले अदालत जानु अन्तिम विकल्प भएको बताए । आफूले सभामुखलाई नै निलम्बन फुकुवाका लागि आग्रह गरेको बताए । सभामुखले निलम्बन फुकुवा गरिदिनु पहिलो विकल्प रहेको बताए ।कहिलेसम्म अदालत जाने भन्ने प्रश्नमा लामिछाने पन्छिए । यो प्रश्नमा लामिछानेले भने, ‘राज्य लागेपछि व्यक्तिको के लाग्दो रहेछ र !
लामिछाने पुस ८ गतेदेखि सांसद पदबाट निलम्बित छन् । संघीय संसदको हिउँदे अधिवेशन सुरु हुने पहिलो दिन गत माघ १८ गते पनि सभामुख घिमिरेलाई भेटेर लामिछानेले सांसद पद निलम्बन फुकुवाको माग गरेका थिए । आफूले सभामुख र संसदबाटै समाधान चाहेको उनले बताए । सभामुखले राजनीतिक दलहरूसँग छलफल गर्ने प्रतिवद्धता जनाएको लामिछानेले जानकारी दिए । आफू दुई पटकसम्म चितवनबाट निर्वाचित भएको उल्लेख गर्दै उनले आफू थुनामा समेत नरहेको बताए ।
