पोखरामा वीरेन्द्रको सालिक अनावरण, पुरानो राष्ट्रिय गान बजाइयो
पोखरामा हिजो भव्य कार्यक्रम गरेर स्वर्गीय राजा वीरेन्द्रको पूर्णकदको सालिक अनावरण गरियो । वीरेन्द्रका भाइ पूर्वराजा ज्ञानेन्द्र शाहले एक भव्य कार्यक्रमबीच सालिक अनावरण गरेका थिए । पोखरा महानगरपालिका- १० राम बजारमा निर्माण भएको सालिक अनावरणको लागि पूर्वराजा पुग्दा राजतन्त्रकालीन झल्को देखियो । बाक्लो संख्यामा उपस्थित समर्थकहरुले ‘राजा आउ देश बचाउ’, ‘हाम्रो राजा हाम्रो देश, प्राणभन्दा प्यारो छ’, ‘श्री ५ वीरेन्द्र अमर रहून्’ जस्ता नारा लगाएका थिए ।
कार्यक्रमको ब्यानरमा लेखिएको थियो– श्री ५ महाराजाधिराज ज्ञानेन्द्र वीर विक्रम शाहदेव सरकारको करकमलबाट स्वर्गीय राजा वीरेन्द्र वीरविक्रम शाहदेवको सालिक अनावरण कार्यक्रम । वीरेन्द्र सालिक निर्माण समितिले यो कार्यक्रमको आयोजना गरेको हो । कार्यक्रममा पूर्वराजा ज्ञानेन्द्रको जयजयकार गरियो । उनलाई मञ्चमा राखिएको आकर्षक सिंहासनमा विराजमान गराइएको थियो ।
सबैभन्दा चर्चायोग्य चाहिँ ‘राष्ट्रिय गान’ रह्यो । हजारौं सहभागी कार्यक्रममा नेपालको पुरानो राष्ट्रिय गान ‘श्रीमान गम्भीर नेपाली…’ घन्काइएको थियो । पुरानो राष्ट्रिय गान बजाउँदा पूर्वराजा उठेका थिए र सकिएपछि थपडी बजाएका थिए । पुरानो राष्ट्रिय गान बजाइएको विषयमा कास्कीका भरतमणि पाण्डेले ‘नाखुशी’ प्रकट गरेका छन् । उनले यो कार्यक्रमका विषयमा आफूहरुलाई जानकारी नै नगराइएको दाबी गरे ।
पाण्डेले भने, ‘कार्यक्रम भएकोबारेमा हामीलाई औपचारिक जानकारी आएको नै छैन । हामीसँग कार्यक्रमका लागि अनुमति लिइएको पनि थिएन । पुरानो राष्ट्रिय गान बजाइनु गलत हो । कुनै पनि कार्यक्रममा पुरानो राष्ट्रिय गान बजाउन पाइँदैन । यसमा आयोजक जिम्मेवार हुन्छ ।
यो ठाउँमा २०५९ सालमा नै राजा वीरेन्द्रको सालिक ठड्याइएको थियो र वीरेन्द्र चोक नामकरण गरिएको थियो । २०६२/६३ सालको आन्दोलनका क्रममा आन्दोलनकारीले सालिक तोडफोड गरे । त्यसपछि सालिक हटाइएको थियो । गत वर्ष २५ लाख रुपैयाँ खर्च गरेर ८ फिट अग्लो नयाँ सालिक निर्माण गरियो । निर्माण समितिले २०८० पुस ९ गते नै सालिक राखिसकेको भए पनि हिजो पूर्वराजाबाट औपचारिक अनावरण गरिएको हो । पूर्वराजा गत माघ २७ गतेदेखि पोखरामा छन् । उनी पर्सि काठमाडौं फर्किने कार्यक्रम छ । काठमाडौंमा उनको स्वागतका लागि भव्य तयारी गरिएको छ ।
