बागमतीमा सवारीसाधनको डिजिटाइजेशन अभिलेख सुरू
बागमती प्रदेशभित्रको सवारी साधनहरूको विद्युतीय अभिलेख सिर्जना (डिजिटाइजेशन) गर्ने काम सुरू गरिएको छ । आज यातायात व्यवस्था कार्यालय मोटरसाइकल, गुर्जुधारामा सम्पन्न एक कार्यक्रमबीच बागमती प्रदेशका श्रम, रोजगार तथा यातायात मन्त्री प्रेमभक्त महर्जनले डिजिटाइजेशनको शुभारम्भ गरे । कार्यक्रममा मन्त्री महर्जनसहित बागमतीका सांसद एवं पूर्वमन्त्री केशवप्रसाद पोखरेल, सांसद रघुनाथ महर्जन, प्रदेश यातायात मन्त्रालय सचिव वीरेन्द्रदेव भारती, विभिन्न यातायात व्यवस्था कार्यालयका प्रमुखहरूको उपस्थिति थियो ।
डिजिटाइजेशनका लागि मन्त्रालयले १०० जना तथ्यांक प्रविष्ट गर्ने कर्मचारीको व्यवस्था गरिएको महर्जनले जानकारी दिए । छिट्टै प्रदेशभित्रका सबै सवारी साधनको विद्युतीय अभिलेख राखिसक्ने र अनलाइनबाटै सवारी साधनको कर तिर्न सकिने र ब्लू बुक बोक्नु नपर्ने अवस्था निर्माण हुने उनले सुनाए । बागमती प्रदेशभित्रको यातायात क्षेत्रमा लाइसेन्स नागरिक एपमार्फत डिजिटलाइज्ड भइसकेको तथा लाइसेन्स बोक्नु नपर्ने भइसकेको उनको भनाइ थियो ।
मन्त्री महर्जनले अबको केही समयमा लिखित परीक्षा र सवारी साधन परिचयपत्रको ट्रायलका लागि मात्र यातायात व्यवस्था कार्यालय आउनुपर्ने र अन्य कार्यका लागि अनलाइनबाट गर्न सकिने वातावरण बन्न लागेको जानकारी दिए । सांसद केशवप्रसाद पोखरेलले सवारी साधनको क्षेत्रमा डिजिटाइजेशनले महत्वपूर्ण अर्थ राख्ने बताए । सांसद रघुनाथ महर्जनले लामो प्रयासपश्चात् यातायातसम्बन्धी वास्तविक अधिकार प्रदेशमा आएको धारणा राखे ।
प्रदेश यातायात मन्त्रालय सचिव वीरेन्द्रदेव भारतीले डाटा इन्ट्रिकर्ताले जतिसक्दो छिटो तथ्यांक प्रविष्टि गर्न सकेमा त्यति धेरै आम्दानी गर्न सक्ने बताए । अधिकतम दुई वर्षभित्र डिजिटाइजेशन सम्पन्न गर्ने मन्त्रालयको लक्ष्य छ ।
