भारतले नेपाललाई १५ वटा राँगो दिने सहमति

 

 

भारतले नेपाललाई १५ वटा मुर्रा भैंसी दिएको प्रसंगले अहिले सामाजिक सञ्जाल तताइरहेको छ । धेरैले चासो राखिरहेका छन्, भारतले दिएका भैंसी कहिले र कसरी नेपाल भित्र्याइन्छ ? कृषि मन्त्रालयले भने भारतले भैंसी नभएर राँगा दिएको बतायो । मन्त्रालयका अनुसार प्रधानमन्त्री पुष्पकमल दाहाल प्रचण्ड भारतबाट फर्किँदा राँगा पनि नेपाल ल्याउने तयारी थियो । तर, क्वारेन्टाइनलगायतका प्रक्रियामा ढिलाइ हुँदा प्रधानमन्त्रीसँग राँगाहरु आएनन् । अर्थ मन्त्रालयले नेपालको टीम पठाउन बजेट निकासामा ढिलाइ गरेकाले प्रधानमन्त्री आउँदा ल्याउन नसकिएको स्रोतले बतायो ।

दुई वर्षअघिदेखि नै नेपाल सरकारले भारतसँग ३० वटा मुर्रा राँगो मागेको थियो । तत्कालीन कृषि तथा पशुपन्छी विकासमन्त्री महेन्द्र राय यादवका पालामा भारतसँग ३० वटा राँगा मागिएको थियो । त्यसपछिका कृषिमन्त्रीहरुले पनि त्यो मागलाई निरन्तरता दिएका थिए । प्रधानमन्त्रीको भ्रमणका क्रममा भारतले १५ वटा राँगो दिने सहमति गरेको हो । भारतीय दूतावासले हिजो विज्ञप्ति जारी गर्दै यस विषयमा जानकारी गराएपछि सञ्चारमाध्यमले समाचार प्रकाशन गरेका थिए ।

कृषि मन्त्रालयका प्रवक्ता प्रकाशकुमार सञ्जेलले भारतबाट १५ वटा भैंसी नभई राँगा आउन लागेको बताए । तर, सामाजिक सञ्जालमा भने भैंसी भनेर चर्चा भएकाले भ्रम परेको उनको भनाइ छ । उनले भने, ‘नेपाल र भारतका प्रतिनिधिहरु रहेको सयुक्त कृषि प्राविधिक कार्य समूह छ । त्यही समूहबाट ३० वटा मुर्रा राँगो माग भएको हो । यी राँगा नेपालको भैंसीको प्रजनन प्रक्रियाको लागि ल्याउन लागिएको । यसले नस्ल सुधार गर्छ ।’ सञ्जेलका अनुसार पशु सेवा विभागको प्राविधिक टोली गएर भारतले दिने भनेको राँगाको स्वास्थ्य ठीक छ कि छैन भनेर चेकजाँच गर्नेछ । त्यसपछि मात्रै त्यो राँगो नेपाल भित्र्याइनेछ ।

नेपालले भारतसँग ३० वटा राँगो खरिद गर्ने प्रस्ताव गरे पनि भारतले सित्तैमा दिन तयार भएको उनको भनाइ छ । नेपालका पशु चिकित्सक गएर भारतले दिने राँगोको स्वास्थ्य परीक्षण गरेपछि मन्त्रालयसँग समन्वय गरेर ल्याउन अनुमति दिइनेछ । भारतले नै ती १५ वटा राँगो नेपालको सिमानमा ल्याएर छाडिदिनेछ । भारतले नेपालको सिमानामा रहेको क्वारेन्टाइनसम्म राँगो ल्याएपछि नेपालले जिम्मा लिनेछ । कृषि मन्त्रालयले राँगो आयात गर्न कर छुटसमेतको व्यवस्था मिलाइसकेको सञ्जेलले बताए । अहिले भारतबाट आयात हुने १५ वटा राँगो कसलाई दिने भन्ने जिज्ञासा पनि सामाजिक सञ्जालमा छ । कृषि मन्त्रालयले भारतबाट ल्याइने राँगा कुनै किसानलाई वितरण नगरिने बताएको छ । ती १५ वटा राँगा सरकारी कृषि फर्ममा नै राखिने छ । पशु सेवा विभागले सञ्चालन गरेको पशु प्रजनन केन्द्रहरुमा राखिने छ । स्रोतका अनुसार भारतबाट ल्याउन लागिएको राँगाको मूल्य डेढ लाख भारतीय रुपैयाँ जति पर्छ ।