एकाबिहानै मापसेमा स्कुलका बसचालकहरु
पछिल्ला केही दिनयता काठमाडौं उपत्यकामा चल्ने स्कुल बसहरूमा ट्राफिक निगरानी बढाइएको छ । साउनको पहिलो साताबाट थालिएको ट्राफिकको यो अभियानमा केही चालक कारबाहीमा परेका छन् । काठमाडौं उपत्यका ट्राफिक प्रहरी कार्यालयले साउनको पहिलो आइतबार विद्यार्थी बोकेका बसमा चेकजाँच गर्दा पाँचजना चालक मापसेमा परे । यो क्रम हिजो पनि जारी रह्यो ।
महानगरीय ट्राफिक प्रहरी कार्यालयका अनुसार हिजो १६ वटा बस कारबाहीमा परेका छन् । तीमध्ये ५ वटा बसका चालकहरूले मादक पदार्थ सेवन (मापसे) गरेको भेटियो । कारबाहीमा परेका चालकहरूले भने राति मापसे गरेको बताएका छन् । अबेर रातसम्म मापसे गर्दा बिहान पनी परीक्षणमा देखिएको ट्राफिक अधिकारीको भनाइ छ ।
प्राय: बिहानको समयमा ट्राफिक कार्यालयले मापसे जाँच गर्ने गरेको थिएन । साँझ भने दिनहुँजसो ट्राफिक टोली चोकचोकमा मापसे चेकजाँचमा खटिने गरेका छन् ।
