सार्वजनिक यातायातले सीटभन्दा बढी यात्रु चढाउन नपाउने
जिल्ला प्रशासन कार्यालय काठमाडौंले लामो दूरीमा चल्ने सार्वजनिक यातायातका यात्रुहरूलाई सम्भव भएसम्म एन्टिजेन परीक्षण गरेर मात्रै यात्रा गराउन र छोटो दूरीका यातायातले सीट क्षमताभन्दा बढी यात्रु नचढाउन आदेश दिएको छ ।
काठमाडौं उपत्यका जारी ‘स्मार्ट लकडाउन’लाई थप कडा बनाउन जिल्ला प्रशासन कार्यालय काठमाडौंले मंगलबार थप आदेश जारी गर्दै सीट क्षमताभन्दा ढबी यात्रुलाई यात्रा नगराउन भनेको हो ।
त्यस्तै सबै यात्रुले अनिवार्यरूपमा मास्कको प्रयोग गर्नुपर्ने, मास्क नलगाउने व्यक्तिलाई बसभित्र छिर्न नदिने, चालक र सह–चालकले अनिवार्यरूपमा फेससिल्ड लगाउनु पर्ने, यात्रुको पहुँच पुग्नेगरी सवारीसाधनको ढोकैमा स्यानिटाइजरको व्यवस्था गरी प्रयोग गराएर मात्रै बस चढाउनु पर्ने, सवारीसाधनलाई दैनिकरूपमा निसङ्क्रमित गर्न र मास्क नलगाई आएका यात्रुलाई बढीमा पाँच रुपैयाँ लिएर मास्क उपलब्ध गराउनु पर्नेलगायत आदेश दिएको छ ।
त्यस्तै लामो दूरीमा चल्ने सार्वजनिक यातायातमा बीच बाटोमा यात्रु नचढाउन पनि प्रशासनले आदेश दिएको छ । आजै राति १२ बजेपछि लागू हुनेगरी जारी गरिएको आदेशमा लामो दूरीका यातायातले यात्रुहरूको विवरण जिल्ला कोभिड–१९ सङ्कट व्यवस्थापन केन्द्र (डीसीसीएमसी) लाई उपलब्ध गराउनुपर्नेसम्मको आदेश दिएको छ ।
यो आदेश मंगलबार राति १२ बजेदेखि लागू भइसकेको छ । आदेश उल्लंघन गर्नेलाई संक्रामक रोग ऐन, २०२० को दफा २ र स्थानीय प्रशासन ऐन, २०२८ को दफा ६ को उपदफा ३ बमोजिमको कारबाही हुने पनि जिप्रका काठमाडौंले स्पष्ट पारेको छ ।
