दुइ पक्षिय हवाइ सम्झौता गर्न रुवाण्डाका राजदुतको प्रस्ताब
रुवाण्डाका गैर आवासीय राजदुत जेक्युलिनी मुकाङ्गीराले नेपाल र रुवाण्डा बीच दुइ पक्षिय हवाइ उडानको सम्झौता गर्न प्रस्ताब राख्नु भएको छ । संस्कृति, पर्यटन तथा नागरिक उड्डयनमन्त्री प्रेमबहादुर आलेसँग आज आइतबार मन्त्रालयमा भएको सिष्टाचार भेटका क्रममा राजदुत मुकाङ्गीराले नेपाल र रुवाण्डा बीच अहिले सम्म हवाइ सम्झौता नभएकाले हवाइ सम्झौताका लागि प्रस्ताब गर्नु भएको हो ।
भेटका क्रममा राजदुत मुकाङ्गीराले नेपाल र रुवाण्डा बीच हवाइ सम्झौता गरिए पर्यटक प्रद्धनमा फाइदा हुने भएकाले उक्त सम्झौता गर्न आवश्यक रहेको बताउनुभयो । उहाँले भन्नुभयो, “रुवाण्डाका पर्यटक भित्रयाउनका लागि भएपनि नेपाल र रुवाण्डा बीच हवाइ सम्झौता गर्न आवश्यक छ, उक्त सम्झौताले दुइ देश मित्रता पनि थप कायम हुँने छ ।” सोही भेटका क्रममा राजदुत मुकाङ्गीराले संस्कृति तथा पर्यटन क्षेत्रमा दुइ पक्षिय सहयोग आदान प्रदान हुनु पर्ने आग्रह गर्नुभयो ।
राजदुत मुकाङ्गीराले राख्नु भएको दुइ पक्षिय हवाइ उडानको सम्झौता प्रस्ताबका बारेमा मन्त्री आलेले सकारात्मक रुपमा लिइएको र औपचारिक माध्यमबाट उक्त प्रस्ताबको प्रक्रिया अगाडी बढाइने बताउनुभयो । उहाँले भन्नुभयो, “दुइ पक्षिय हवाइ उडानको सम्झौता प्रस्ताब हामीले सकारात्मक रुपमा लिएका छौँ, औपचारिक माध्यम तथा छलफलबाट प्रक्रिया अगाडी बढाउने छौँ ।” उक्त सिष्टाचार भेटका क्रममा मन्त्रालयका सचिब महेश्वर न्यौँपाने तथा सह सचिब बुद्धिसागर लामिछानेको सहभागिता रहेको थियो । विमल विष्ट
