पर्यटन बोर्डका सीईओ र भन्सारका कर्मचारीबीच धकेला–धकेल
शनिबार (भाइटीका)का दिन नेपाल पर्यटन बोर्डका सीईओ डा. धनन्जय रेग्मी र भन्सारका कर्मचारीबीच लफडा भएको छ । तर, दुबै पक्षले एक–अर्काका कारण घटना भएको दावि गरेका छन् । लण्डनमा आयोजना भएको विश्व ट्राभल मार्टमा सहभागी भएर नेपाल फर्किएका सीईओ र भन्सार चेकिङमा बसेका कर्मचारीबीच धकेला–धकेलासम्मको अवस्था आएको छ ।
नेपाल पर्यटन बोर्डका सीईओ रेग्मीलाई त्रिभुवन भन्सार कार्यालयले ५ हजार जरिवाना तिराएको छ । भन्सार कार्यालय प्रमुख महेश भट्टराईले भने, ‘म व्यक्ति को हो चिन्दिन, तर भन्सार कर्मचारीमाथि दुर्व्यवहार भएपछि जरिवाना तिराइएको छ ।’
उता, नेपाल पर्यटन बोर्डका सीईओ डा. रेग्मीले भने घटना भएको स्वीकार गरे । विमानस्थलमा झरेपछि सीसीएमसीदेखि भन्सार कटुन्जेल कर्मचारीको तुच्छ व्यवहार र बोली सहन नसकेपछि आफुले आवाज उठाउन खोज्दा मापसे गरेको भन्दै आफुलाई फसाउन खोजिएको उनले बताए ।
भन्सार कर्मचारीले डा. रेग्मीले हातपात गरेको बताएका छन् । यता, रेग्मीले भने भन्सार चेक पार गरिसकेपछि पनि ‘तँ तँ म म’, ‘त्यसलाई रोक’ भन्दै कर्मचारीले तान्न खोजेपछि आफूले धकेलेको बताए । अध्यागमनदेखि भन्सारसम्म हरेक दिन विमानस्थलमा जनताले सास्ती पाएका छन्, अरु सर्वसाधारणले बोल्दा कतै सुनिदैन, मैले बोल्न खोजे, इस्यू बनाइयो,’ उनले भने।
