थप १,९११ जनामा कोरोना, आजसम्म ५०९ जनाको मृत्यु
पछिल्लो २४ घण्टामा देशभर थप १,९११ जनामा कोरोना भाइरस (कोभिड-१९) को संक्रमण पुष्टि भएको छ।
स्वास्थ्य तथा जनसंख्या मन्त्रालयले बिहिबार आयोजना गरेको नियमित मिडिया ब्रिफिङमा मन्त्रालयका प्रवक्ता प्रा.डा. जागेश्वर गौतमले पछिल्लो २४ घण्टामा थप १,९११ जनामा कोरोना संक्रमण पुष्टि भएको बताए। योसँगै नेपालमा कोरोना संक्रमितको ७९ हजार ७२८ संख्या पुगेको छ । उनीहरुमध्ये ५०९ जनाको मृत्यु भएको छ ।
गत २४ घण्टामा देशभरका प्रयोगशालामा १२ हजार ४४४ जनाको नमुना परीक्षण गर्दा उनीहरुमा संक्रमण पुष्टि भएको प्रवक्ता डा. गौतमले बताए । पछिल्लो २४ घण्टामा कोरोना निको भएर थप ९६१ जना अस्पतालबाट डिस्चार्ज भएर घर फर्किएका छन्, भने अहिलेसम्म कोरोना निको हुनेको ५७ हजार ३८९पुगेको छ।
हाल देशभर सक्रिय संक्रमितको संख्या २१ हजार ८३० जना रहेको मन्त्रालयले जनाएको छ । त्यस्तै क्वारेन्टिनमा ५ हजार ७७ जना रहेका छन्।
