प्रचण्ड आइसोलेसनमा, आन्तरिक र बाह्य भेटघाट बन्द
नेकपा अध्यक्ष पुष्पकमल दाहाल प्रचण्ड एक साताका लागि आइसोलेसनमा बसेका छन् । आफ्नै सुरक्षा घेरामा रहेका प्रहरीमा कोरोना देखिएपछि प्रचण्डले आन्तरिक र बाह्य भेटघाट बन्द गरेका छन् ।
प्रचण्डको सुरक्षामा खट्टिएका सवै सुरक्षाकर्मी र सचिवालयका सवै सदस्यहरुको कोरोना परीक्षण गरिएको छ । उनीहरुको रिपोट नआएसम्म सवैखाले भेटर्वार्ता बन्द गरेको सचिवालयले जनाएको छ ।
प्रचण्डको सुरक्षामा रहेका ६ प्रहरीमा कोरोना देखिएको थियो । त्यसपछि सवै सुरक्षाकर्मीको कोरोना परीक्षण गरिएको थियो । तर प्रचण्ड परिवारको भने कोरोना रिपोट नेगेटिभ आएको छ । आफ्ना सुरक्षाकर्मीलाई कोरोना देखिएपछि प्रचण्डले शुक्रवार राखिएको सम्पादकहरुसँगको बैठक अन्तिम अबस्थामा आएर स्थगित गरेका थिए ।
प्रचण्ड आइसोलेसनमा बसेपछि प्रधानमन्त्री केपी शर्मा ओलीसँगको सम्वाद बन्द भएको छ । नेकपाभित्रको विवाद मिलाउन दुई अध्यक्ष दैनिक सम्वादमा थिए । तर कोरोनाको आशंकामा परेपछि प्रचण्ड आफै बालुवाटार जान छोडेका छन् ।
आइसोलेसनमा बसेका प्रचण्डले शनिवार ओली निकटका तीन नेतालाई भने आफ्नै निवासमा भेटेको स्रोतले बताएको छ । श्ुक्रवार निवास पुगेका संसदीय दलका उपनेता सुवास नेम्वाडसँग भेट गरेका प्रचण्डले शनिवार महासचिव विष्णु पौडेल र स्थायी कमिटी सदस्य शंकर पोखरेलसँग भेटघाट गरेका थिए ।
