मौलापुर नगरपालिकामा दोस्रो चरणको राहत वितरण
राकोरोना भाइरस (कोभिड–१९) नियन्त्रणका लागि जारी गरिएको लकडाउन लम्बिदै गएको कारण मारमा परेका नगरवासीका लागि रौतहटको मौलापुर नगरपालिकाले दोस्रो चरणको राहत वितरण गरिरहेको छ । कोहि पनि नछुट्ने गरि नगरभरका सबै नागरिकका लागि नगरपालिकाले राहत कार्यक्रम सुरु गरेको छ । तर सबैले पाउने राहतको स्वरुप एकै किसिमको छैन ।
नगरपालिकाले गरीब, असहाय र ज्यालादारीमा आश्रित गरिबका लागि खाद्यान्न तथा धनी घरपरिवारका लागि धानको बिउ वितरण गरिरहेको छ । कोरोना भाइरसको संक्रमण रोक्न सरकारले मुलुकमा ’लकडाउन’ लागू गरेसंगै देशैभरका नागरिक घरभित्रै बस्न बाध्य भएपछि मर्कामा परेका आफ्ना नगरवासीका लागि मौलापुरमा ‘धनीलाई धानको बीउ , गरीबलाई राहत, सम्पूर्ण नगरवासीलाई नगरप्रमुखको साथ’ कार्यक्रम संचालन गरिएको छ ।
दोस्रो चरणको राहत कार्यक्रम अन्तर्गत गरीब परिवारलाई २० किलो चामल, २ किलो दाल र १ किलो नुन लगायतको राहत सामग्री वितरण गरिदैछ भने धनी परिवारलाई खेतीका लागि ३५ किलो उन्नत धानको बिउ वितरण गरिदैछ ।
मौलापुर नगरपालिकाकी प्रमुख रीनाकुमारी साहले पहिलो चरणमा वितरण गरिएको राहत सामाग्री सकिसकेको हुनाले नगरवासीलाई अप्ठ्यारो परेको र किसानहरुले धानबाली लगाउने बेला रहेकोले उक्त कार्यक्रम संचालन गरिएको बताइन् ।
प्रदेश नम्बर २ मै एक मात्र महिला स्थानीय तह प्रमुख रहेकी मेयर साहले पहिलो चरणझै दोस्रो चरणमा पनि सामाजिक दुरी कायम गरेर सबै वडामा वितरण भइरहेको जानकारी दिइन् ।
यसअघि पनि नगरपालिकाले सम्पूर्ण ज्यालादारीमा आश्रित, असहाय र गरीब घरपरिवारका लागि घोषणा गरिएको राहतअन्तर्गत हरेक परिवारलाई २० किलो चामल, ४ किलो दाल र नगद ५ सय रुपैयाँलगायतको सामग्री प्रदान गरेको थियो ।
अन्य स्थानीय तहहरु नागरिकलाई वेवास्ता गरेको आलोचना भइरहेको अवस्था मौलापुर नगरपालिकाको यो कदम सराहनीय रहेको भन्दै प्रसंशा भइरहेको छ । नगरवासीप्रति जिम्मेवार भइ सरकारको कदमलाई सघाउने मौलापुर नगरपालिकाले गरेको कार्य उदाहरणीय छ ।
