लिपुलेकमा भारतले सडक बनाएकोमा नेपाल सरकारको आपत्ति
भारतले नेपाली भूभाग लिपुलेक हुँदै कैलाश मानसरोवर जाने सडक बनाएकोमा नेपाल सरकारले आपत्ति जनाएको छ ।
परराष्ट्र मन्त्रालयले आज (शनिबार) विज्ञप्ति जारी गर्दै नेपाली भूभागमा सडक बनाएकोमा आपत्ति जनाएको छ ।
सुगौली सन्धिअनुसार लिम्पियाधुरा, कालापानी र लिपुलेकसहित काली (महाकाली) नदीको पूर्वक्षेत्र नेपाली भूभाग भएको परराष्ट्र मन्त्रालयद्वारा विज्ञप्तिमा प्रष्ट भएको छ । पछिल्लो पटक भारतले जारी गरेको नक्साका सम्बन्धमा पठाएको कूटनीतिक नोटमा समेत त्यसलाई उल्लेख गरिएको मन्त्रालयले बताएको छ ।
भारतको यस्तो कदमले नेपाललाई दुःखित तुल्याएको परराष्ट्रमन्त्री प्रदीप ज्ञवालीले बताएका छन् ।
तिब्बतमा रहेको कैलाश मानसरोवर यात्राका लागि उत्तराखण्डस्थित धार्चुला क्षेत्रको पिथौरागढबाट नेपालको दार्चुलाको गुन्जी क्षेत्रबाट लिपुलेक पुग्ने लिंक रोडको भारतले शुक्रबार उद्घाटन गरेको थियो । यसको नेपालमा विरोध भइरहेको छ ।
भारतीय कदम सीमा विवाद सम्वादबाट हल गर्ने दुई देशका प्रधानमन्त्रीको सहमतिको विपरित भएको भन्दै परराष्ट्र मन्त्रालयले भनेको छ–‘नेपाली भूमिमा कुनै पनि गतिविधि नगर्न नेपाल सरकार भारत सरकारलाई आग्रह गर्दछ ।’
शुक्रबार भारतका रक्षामन्त्री राजनाथ सिंहले भारतका यात्रीलाई मानसरोवरको यात्रा गर्न सहज हुनेभन्दै उक्त मागको उदघाटन गरेका थिए ।
दार्चुलापारि भारतीय जिल्ला धार्चुला सदरमुकाम पिथौरागढबाट लिपुलेक नाका जोड्ने ८० किलोमिटर सडक मिडियो कन्फेन्समार्फत उद्घाटन गरिएको थियो ।
