१० दिनदेखि अपहरणमा परेका बालकको सकुशल उद्दार, अपहरणकारी गोली हानेर पक्राउ
पर्सा प्रहरीले अपहरणकारीमाथि गोली प्रहार गरी अपहरित बालकको सकुशल उद्दार गरेको छ ।
पर्सा प्रहरीले पर्साको वीरगन्ज महानगरपालिका–२५ सिर्सिया घर भइ काभ्रेको बनेपा बस्दै आएका अम्जद खानका १४ वर्षीय छोराको सकुशल उद्दार गरेको हो ।
बनेपाबाट वीरगन्ज आउने क्रममा अम्जदका १४ वर्षीय छोरा कात्तिक १० गते अपहरणमा परेका थिए ।
प्रहरीले १० दिनको प्रयासपछि अपहरित बालकलाई सकुशल उद्दार गरेको हो ।
अपहरणकारीले अपहरणमा परेका बालककै मोबाइलबाट फोन गरेर अम्जदसँग १२ लाख रुपैयाँ फिरौती मागेका थिए । १२ लाख रुपैयाँ नदिए छोराको हत्या गरिदिने भन्दै अपहरणकारीहरुले बारम्बार धम्की दिइरहेको अवस्थामा अम्जदले प्रहरीको मद्दत मागेका थिए ।
अपहरणकारीले बारम्बार फोन गरी फिरौती माग्न थालेपछि प्रहरीले अपहरणकारीलाई फिरौती रकम लिने क्रममा नै पक्राउ गर्ने योजना बनाएको थियो ।
प्रहरीकै योजनाअनुसार अम्जादले अपहरणकारीलाई बुधबार फिरौती रकम लिनका लागि वीरगन्ज बोलाएका थिए ।
फिरौती रकम लिनका लागि अपहरणकारी वीरगन्जतर्फ आइरहेको सूचनाका आधारमा परिचालन भएको प्रहरीले फिरौती लिएर भाग्न लागेको अवस्थामा अपहरणकारीलाई पक्राउ गर्न सफल भएको हो ।
पक्राउ पर्नेमा पर्साको पोखरीया नगरपालिका–६ सोनवरी बस्ने जोख्खु दासका २० वर्षीय छोरा कुमार दास छन् ।
प्रहरीले गोली प्रहार गरी कुमारलाई पक्राउ गरेको हो । गोली प्रहारबाट घाइते भएका कुमारको अहिले नारायणी अस्पताल वीरगन्जमा उपचार भइरहेको जिल्ला प्रहरी कार्यालय पर्साले जनाएको छ ।
प्रहरीले उनको साथबाट बीआर २२ जे ०८०३ नम्बरको मोटरसाइकल, १ थान कटुवा पेस्तोल र त्यसमा लोड गरिएको गोली १ राउण्डसहित अन्य ४ राउण्ड गोली लगायत सामग्री बरामद गरेको छ ।
अपहरणकारीलाई पक्राउ गरेपछि अपहरणमा परेका बालकको सकुशल उद्दार गरिएको प्रहरीले जनाएको छ । अपहरणमा अन्य २ जनाको संलग्नता रहेको पनि खुलेको छ । उनीहरु भने फरार छन् ।
प्रहरीले फरार रहेका अपहरणकारीको खोजी कार्य जारी रहेको जनाएको छ ।
