हाइड्रो पावरको सुरुङभित्र थुनिएका तीन जनाको शव भेटियो
बझाङको बुंगल नगरपालिकास्थित कालङ्गा हाइड्रो पावरको सुरुङभित्र थुनिएका मध्ये तीन जनाको शव भेटिएको छ ।
सशस्त्र प्रहरी बल, नेपाल विपद् व्यवस्थापन तालिम शिक्षालाय कुरिनटारबाट गएको उद्धार टोली सोमबार थुनिएका चारमध्ये तीजनाको शव फेला पारेको हो ।
जिल्ला प्रहरी कार्यालय बझाङका प्रवक्ता ईश्वरीदत्त पाण्डेयका अनुसार सोमबार दिउँसो साढे ३ बजेको समयमा उनीहरुको शव सुरुङभित्र भेटिएको हो । ‘उद्धार टोलीले तीन जना मजदुरको शव सुरुङभित्र भेट्टाएको छ’, उनले भने, ‘हराइरहेका अर्का एक जनाको पनि खोजी भइरहेको छ तर फेला पार्न सकिएको छैन ।’
सुरुङभित्र लगिएको अक्सिजनको पाइपलाइन एकाएक अवरुद्ध भएपछि उनीहरू निसास्सिएर थुनिएका थिए । सुरुङभित्र दैलेखका कर्णबहादुर शाही, महेन्द्रबहादुर शाही, अछामका महेन्द्र साउद र बझाङका शेरसिंह धामी थुनिएका थिए ।
