आज पनि देशभर पानी पर्ने
दशैंको पहिलो दिन शुरु भइसक्दा समेत मौसम भने दशैं आए जस्तो छैन । आज (आइतबार) पनि देशभर घाम लागेको छैन । आज (आइतबार) देशभर मौसम बदली रही केही स्थानमा हल्कादेखि भारीसम्म वर्षाको सम्भावना रहेको मौसमविद्ले जानकारी दिएका छन् ।
आज (आइतबार) बिहान काठमाडौं उपत्यकासहित देशभर मौसममा बदली आएको छ । पूर्व र मध्यका केही तथा पश्चिमका एक–दुई स्थानमा पानी परिरहेको मौसम पूर्वानुमान महाशाखाकी मञ्जु बासीले जानकारी दिएकी छन् ।
दिउँसो पनि मौसम यस्तै रहने उनले बताइन् । पूर्व र मध्यका एक–दुई स्थानमा भारी वर्षाको समेत सम्भावना रहेको मौसमविद् बासीले जानकारी दिइन् । उनका अनुसार आज काठमाडौं उपत्यकामा पनि दिनभर घाम लागेर मौसम उघ्रिने सम्भावना छैन ।
भोलि (सोमबार) देखि भने मौसम क्रमिक रूपमा सुध्रिँदै जाने उनको अनुमान छ । ‘आजलाई मनसुन सक्रिय नै छ,’ मौसमविद् बासीले भनिन्, ‘भोलि (सोमबार) बाट मौसम क्रमशः सुधार हुने संकेत देखिएको छ ।’
