अब उपत्यकामा सुन्दर यातायातको ट्याक्सी, भाडा ३० प्रतिशत सस्तो
काठमाडौंमा विद्युतीय बस सेवा शुरु गरेको सुन्दर यातायातले अब उपत्यकामा ट्याक्सी सेवा पनि शुरु गर्ने भएको छ ।
सुन्दर यातायात प्रालिले तिहार पछि नैै १५ वटा विद्युतीय कारण चलाउने तयारी भइरहेको सुन्दर यातायातका अध्यक्ष भेषबहादुर थापाले जानकारी दिएका छन् । ‘दशैंपछि ट्याक्सी आइपुग्छ ।
प्राविधिक परीक्षण सकेर तिहारपछि ट्याक्सी चलाउने तयारी गरिरहेका छौं,’ उनले भने । सुन्दरका ट्याक्सीमा भाडा अरु ट्याक्सी भन्दा ३० प्रतिशत सस्तो हुने उनले जानकारी दिएका छन् ।
‘हाम्रो ट्याक्सीमा खर्च निकै कम छ । फुलचार्ज गर्न ४५० रुपैयाँको बिजुली लाग्छ र यसबाट २५० किलोमिटर यात्रा गर्न सकिन्छ । त्यही भएर हामीले यात्रुसँग कम पैसा लिने सोंच बनाएका हौ,’ उनले भने ।
यी ट्याक्सी होम चार्जिङमा चार्ज गर्न ३ घण्टा लाग्ने र फास्ट चार्जिङमा डेढ घण्टामा फुलचार्ज हुने थापाले जानकारी दिएका छन् । सुन्दर यातायातले हाल दुई विद्युतीय बसबाट काठमाडौंमा चलाइरहेको छ ।
