भूमिहीन सुकुम्वासीले जग्गा पाउँदा प्रतिपक्षीकाे टाउकाे किन दुखेकाे ?

हाम्रो इकोनोमि

 

सुकुम्वासीलाई जग्गा दिने भन्दा किन हाम्रो टाउको दुख्छ ? चुनावका बेला दिएको वाचा पूरा गर्न हामी किन आनाकानी गर्छाैं ? ती गरिबहरुलाई देखेर हामीलाई किन टाउको दुख्छ ?

यस्ता प्रश्न उठाएकी हुन् नेकपाकी सांसद् शान्ता चौधरीले । प्रतिनिधि सभामा भूमि विधेयक उपर बोल्दै शान्ताले भनिन्– ‘०७ सालदेखि नारा दिइयो– जग्गा जोत्नेको, घर पोत्नेको भन्दै पार्टीहरुले नारा दिए तर जहिले पनि झुक्याए । अहिले पनि झुक्याउने प्रयास भइरहेको छ ।’

भूमि विधेयकले सुकुम्वासी तथा भूमिहीनहरुलाई जमिन दिने व्यवस्था गरेपछि प्रतिपक्ष कांग्रेसले असन्तुष्टि जनाएकाे छ । त्यसैलाई लक्षित गर्दै शान्ताले जग्गा दिन्छौं भन्दै चुनावका बेला सबै पार्टीले भन्ने गरेको तर झुक्याइएको उनले बताइन् । भूमिहीन समुदायको पीडा दलहरुले नबुझेको पनि उनले बताइन् । विधेयकले जनताकाे पीडा बुझेकाे उनले जिकिर गरिन् ।

‘सुकुम्वासी, भूमिहीन, सर्वहारा श्रमजीवीहरु कुनै एउटा पार्टीका हुँदैनन्, सुकुम्वासी भूमिहीनहरु सत्तापक्षका मात्र हुन् भनेर अहिले भनिँदैछ । यो गलत हो’– उनले भनिन्– ‘भूमिहीन सुकुम्वासीले जग्गा पाउने कामको विरोध नगरौं ।’

उनले भूमिहीनतालाई देशकै सबैभन्दा ठूलो मुद्दा भन्दै विपन्न सर्वहाराहरुको पीडा सबै पार्टीले सम्बोधन गर्नुपर्ने बताइन् ।

‘प्रजातन्त्र आयो भने भूमिहीनले जमिन पाउँछ भनियो, गणतन्त्र लोकतन्त्र आएपछि जमिन पाउँछ भनियो, संविधान बन्यो भने जमिन पाउँछ भनियो । अझै कति ढाँट्ने ?’– शान्ताले भनिन् ।

भूमिहीन सुकुम्वासी परिवारको बीचमा गएर उनीहरुको पीडा महशुस गर्न आग्रह गर्दै शान्ताले भनिन्– ‘जुन पीडा त्यो परिवारले भोगेको छ त्यो पीडा आफूहरुले भोग्न परेको भए कस्तो हुन्थ्यो ? सबैले सोंच्न पर्दैन ?’

उनले भनिन्– ‘भोट माग्न हामी सबै त्यो समुदाय बीच पुग्छौं तर आज त्यो समुदायमा सत्तापक्षका मात्र कार्यकर्ता छन् भनेर शंका गर्नु ठिक होइन ।’