भयानक कार दुर्घटना, एकै परिवारका ७ जनाको निधन
अचानक भएको कार दुर्घटनामा ७ जनाको ज्यान गएको छ । यात्रुले भरिएको कार अनियन्त्रित भएर पल्टीदा ७ जनाको ज्यान गएको छ । भारत महाराष्ट्रको सतारामा आज दुर्घटना भएको हो । ज्यान गुमाउनेहरु सबै एकै परिवारका सदस्य भएको भारतीय सञ्चारमाध्यमहरुले जानकारी दिएका छन् ।
यस घटनामा चालक गम्भीर घाइते भएको र उनको उपचार भइरहेको जानकारी दिइएको छ । यो दुर्घटना सतारा नजिक बोरगाउँ क्षेत्रको बेंगलुरु–पुणे राजमार्गमा भएको हो । कर्नाटक धारवाड़ निवासी निजामुद्दीन सौदागर परिवारका ६ सदस्यसहित मुम्बई तर्फ आइरहेका थिए । आज राती करीब एक बजे कार दुर्घटनामा परेको थियो ।
मर्नेहरुमा २ पुरुष, २ महिला १ जना साढे तीन वर्षको छोरा र ५ र ७ वर्षकी दुई छोरी रहेका छन् । प्रहरीले दिएको जानकारी अनुसार ५ जनाको घटनास्थलमा नै ज्यान गएको हो । बोरगाउँका एएसपी सीएस मालीले तिव्र गतिका कारण कार दुर्घटनाग्रस्त भएको जानकारी दिए ।
कारमा निजामुद्दीन सौदागर, उनकी पत्नी, छोरा, बुहारी, एक नाती र दुई नातिनी सवार थिए । निजामुद्दीनका नातेदार अहिले घटनास्थल पुगेका छन् । घटनाबारे आवश्यक थप अनुसन्धान भइरहेको प्रहरीले जानकारी दिएको छ ।
