एउटा दुर्लभ संयोग परिवार नै एकैपटक यसरी भए चर्चित ।

हाम्रो इकोनोमि

 

 

अहिले नेपाली संचारमाध्यम र सामाजिक सञ्जालमा एउटा परिवारको चर्चा निकै चुलिएको छ । यस्तो संयोग कमै मात्रै जुर्छ । तिनै दुर्लभ संयोगले चर्चित परिवार हो, मकवानपुरका नेता विरोध खतिवडाको परिवार । यो परिवारवाट भाइरल भएका पात्रहरु हुन् विरोध खतिवडा, मुनु सिग्देल र शृंखला खतिवडा ।

 

श्रीमान्–श्रीमती विरोध खतिवडा र मुनु सिग्देल दुवै राजनीतिकर्मी हुन् । र, दुवै सांसद पनि हुन् । विरोध प्रतिनिधिसभा र मुनु प्रदेशसभा (३ नं प्रदेश)का सांसद हुन् । शृंखला खतिवडा विरोध र मुनुकी एक्ली छोरी हुन् । भनिरहनु पर्दैन की श्रृंखला २०१८ की मिस नेपाल र मिस वल्र्डकी चर्चित प्रतिस्पर्धी हुन् । यतिबेला यि तिनै जना चर्चाको शिखर चुमिरहेका छन् । विरोध र मुनु राजनीतिक कारणले चर्चामा छन् भने श्रृंंखला आफ्नो प्रेमी सार्वजनिक गरेका कारण चर्चामा छिन् ।

 

विरोध र मुनुको परिचय यतिमा मात्रै सिमित छैन । साउन ५ गते आइतवार बसेको नेपाल कम्युनिष्ट पार्टी नेकपाको सचिवालय बैठकले विरोध खतिवडालाई मकवानपुरको जिल्ला इन्चार्ज बनाउने निर्णय गरेको छ । उनकी पत्नि अर्थात मुनु सिग्देललाई नेकपाले यसअघि नै जिल्लाको अध्यक्ष बनाईसकेको छ । अर्थात श्रीमान् जिल्लाको इन्चार्ज, श्रीमती जिल्लाकी अध्यक्ष । यतिबेला सामाजिक सञ्जाल र संचारमाध्यमहरुमा उनीहरुको चर्चा चुलिएको छ । विरोधीहरुले विरोध दम्पत्तीको ब्यंग्यात्मक आलोचना समेत गरिरहेका छन् ।

 

यता विरोध र मुनुकी छोरी श्रृंखलाको चर्चा बाबु–आमाको भन्दा बढी छ । सामाजिक संजाल फेसबुक, ट्विटर र अनलाइनहरु श्रृंखलाको प्रेमिल खबरहरुले भरिएका छन् । तस्बिरहरु भाइरल बनेका छन् । उनी यतिबेला टर्कीमा छिन् । उनीसँगै छन् भ्लगर सिशन बानिया । सिशन सँगै खिचिएका श्रृंखलाका तस्बिरहरु अहिले भाइरल बनेका हुन् । ति तस्बिरमा दुवैले प्रेम भाव प्रकट गरेका छन् ।

 

सिशनले आफ्नो इन्स्टाग्राममा शेयर गरेको तस्बिरमा उनको काँधमा श्रृंखलाले टाउको राखेकी छिन् । सो क्रममा दुवैजना खुबै खुसी देखिन्छन् । कसैको काँधमा ढुक्कसँग टाउको राखेको भन्दै गहिरो अर्थ लगाउन थालिएको हो । अर्थात श्रृंखलाको यो तस्बिर सार्वजनिक भएपछि उनीहरू प्रेममा रहेको चर्चा ब्याप्त भएको हो । सिशनले मिस नेपाल प्रतिस्पर्धाको यात्राबाट श्रृंखलालाई साथ दिइरहेका छन् ।

 

तस्बिर मात्र होइन उनीहरू दुवैजना एकैसाथ रहेको भिडियो समेत सामाजिक सञ्जालमा सार्वजनिक भएको छ । टर्कीको स्तानबुलमा तयार गरिएको उक्त भिडियोमा सिशन र श्रृंखला रमाइरहेको देख्न सकिन्छ । दुवै जना प्रेममा रहेको चर्चा चले पनि सार्वजनिक रुपमा भने उनीहरु बोलेका छैनन् ।

 

पदोन्नती तथा प्रेमिल प्रगति हासिल गर्न सफल खतिवडा परिवार चौतर्फी रुपमा शुभकामना र बधाई पाउन समेत सफल छ ।