अमिषामाथि अढाई करोड ठगीको आरोप
बलिउड निर्माता अजयकुमार सिंहले अभिनेत्री अमिषा पटेलमाथि धोकाधडीको आरोप लगाएका छन् ।
अमिषाले फिल्म ‘देसी म्याजिक’ का लागि ऋण लिएको अढाई करोड रुपैयाँ फर्काउन आनाकानी गरेको उनको भनाइ छ ।
आफूले एक वर्षदेखि पैसा मागिरहे पनि अमिषाले फर्काउने नामै नलिएको भन्दै सिंहले अदालत गुहारेका छन् ।
३ करोड रुपैयाँको चेक बाउन्स भएपछि राँचीको अदालतमा मुद्दा दायर गरेको उनले बताए । ‘देसी म्याजिक फिल्म रिलिजका लागि उनले मसँग पैसा लिएकी थिइन्, तर त्यसलाई फर्काउन कुनै जवाफ नै दिइरहेकी छैनन्,’ सिंहले भने ।
अदालतले जुलाई ८ का लागि पेसी तोकेको छ । अमिषा अदालतमा हाजिर नभए उनीविरुद्ध वारेन्ट जारी हुने उनले बताए।
