आफूलाई ‘धर्ती माता’ भनेर युवतीलाई यातना दिने महिला पक्राउ
काठमाडाैँको भद्रकाली मन्दिरमा आफूलाई ‘धर्ती माता’ बताएर युवतीलाई यातना दिने महिला पक्राउ परेकी छन् । काठमाडौं प्रहरी परिसर, टेकुको विशेष टोलीले ‘धर्ती माता’ भनिने विष्णु कुँवरलाई शुक्रबार बिहान बालाजुबाट पक्राउ गरेको हो ।
अहिले उनलाई काठमाडौं प्रहरीको हिरासतमा राखिएको छ । एक साताअघि उनले सर्वसाधारणको भिडकाबीच युवतीलाई यातना दिएकी थिइन् । जसको भिडियो सामाजिक सञ्जालमा भाइरल भएको थियो । प्रहरीले हालसम्म पीडितलाई भने भेटेको छैन । पीडितलाई उजुरी दिन प्रहरीले आग्रह गरेको छ ।
भिडियोमा कुँवरले युवतीलाई पिट्दै ‘तँ को होस्, छिटो निस्की’ भनेर गाली गरेकी छन् । उनले ‘तेरो मासु खाम्ला, मलाई चिन्’, जस्ता शब्दको पनि प्रयोग गरेकी थिइन् ।
