जनकपुरमा ठूलो बिस्फोट : ८ सिलिण्डर पड्कीएपछि होटलमा भीषण आगलागी
धनुषाको जनकपुरधाम उपमहानगरपालिका–२, पदम चोकमा ठूलो बिस्फोट भएको छ । ठूलो बिस्फोटको आवाजसहित गोविन्द मिष्ठान्न भण्डारबाट भीषण आगलागी सुरु भएको छ ।
अहिले आगलागी अन्य दुई पसलमा पनि फैलिएको छ ।
राति करिब २–४० मा आगलागी भएपछि पसलमा राखिएका ८ वटा सिलिण्डर विष्फोट हुँदा ३ वटा होटल जलेका हुन् ।
जिल्ला प्रहरी कार्यालय, धनुषाका एसपी शेखर खनालका अनुसार प्रारम्भिक अनुसन्धानले फ्रिजको तार सर्ट भएर आगलागी सुरु भएको हुनसक्ने देखिएको छ ।
‘कामदारले आगलागी भएको थाहा पाउनासाथ प्रहरीलाई खबर गरेका थिए’, खनालले भने, ‘खबर पाउनासाथ नेपाली सेना, सशस्त्र प्रहरी र स्थानीयको सहयोगमा आगो नियन्त्रणमा लिने प्रयास गरिएको थियो ।’
उपमहानगरपालिकाका दुई वटा र महेन्द्रनगरको एउटा दमकलको सहयोगमा बिहीबार बिहान करिब ५ बजे आगो नियन्त्रणमा आएको खनालले बताए । क्षतिको पूर्ण विवरण आएको छैन । आगलागीको घटनाबारे थप अनुसन्धान भइरहेको प्रहरीले जनाएको छ ।
