रिनाका प्रेमी कमलकी श्रीमती पनि अनुसन्धानको घेरामा ! (भिडियोसहित)
पथरीकी रिना बस्नेतको मृत्यु पछि उनका प्रेमी भनिएका कमल नेपाल पक्राउ परेका छन् । नेपालले रिना आफ्नी प्रेमिका भएको स्वीकार गरेका छन् ।
तर उनले हत्या गरेको भने अस्वीकार गरेका छन् ।
यो घटनाले वैदेशिक रोजगारको कारण समाज खण्डित भएको विकृतीपूर्ण अवस्थालाईसमेत उजागर गरेको छ ।
२९ वर्षिया रिनाका श्रीमान सन्तोष विदेशमा थिए ।
सन्तोषलाईसमेत रिना अन्य व्यक्तिसँग नजिकिएको बारे थाहा थियो । तर कति गाढा गरी हो भन्ने विषयमा भने थाहा थिएन । त्यसैले पछिल्लो समयमा उनले विदेशबाट रिनालाई पैसा पठाउन पनि कम गरेको बताइन्छ ।
यता कमल नेपाल पनि विवाहित व्यक्ति हुन् । इटहरीकी मनिता उनकी श्रीमती हुन् ।
केही समययता मनिता र कमलबिच खटपट थियो । कमलले आफ्नो सालोले कमाएको पैसाबाट किनेको जग्गा आफ्नो नाममा ल्याएका थिए । सालो अफगानिस्तानबाट फर्किएर हिसाब खोजे तर, भाका सार्दै जग्गा फिर्ता नगरेपछि कमल र मनिताको सम्बन्ध पनि बिग्रिएको थियो ।
पथरी आसपासका क्षेत्रमा जग्गाको कारोबार गर्दै आएका कमललाई गत वैशाखमा ससुराली पक्षका व्यक्तिले पथरी बजारमै कुटपिट गर्दै इलाका प्रहरी कार्यालय पुर्याएका थिए । तर लेनदेनको विषय नेहेर्ने भन्दै प्रहरीले फर्कायो ।
त्यही विवादका बिचमा मनिता सो घटना भएको केही दिनअघि पथरी गएकी थिइन् । त्यसबेला उनलाई कसैले तेरो श्रीमानले अर्कैसँग बिहे गरेको छ, केही लिएर हिँड्छ भनेर सुनाए ।
उनले फोनमै श्रीमानलाई धम्की दिइन् र भनिन्, छोराहरुलाई काठमाडौंमा लगेर राख्छु र आएर तपाई र त्यो आइमाईलाई जुत्ताको माला लगाएर पथरी बजार घुमाउँछु ।
मनिताले आफ्नो श्रीमान र त्यो केटीलाई कालो मोसो दलेर पथरी घुमाउने धम्की श्रीमानलाई दिएकी थिइन् । त्यसैले रिनाको हत्या कमलकी श्रीमतीले गरेको हो कि भनेर शंका गर्ने मानिसहरु पनि एकातिर छन् ।
मनिताकाअनुसार रिनासँग सामान्य चिनजान थियो तर, उनीसँगै आफ्नो श्रीमानको प्रेम सम्बन्ध भएको थाहा थिएन । रिनाको शव भेटिएपछि मात्रै कमलले फोन गरेर मनितालाई त्यो केटी रिना नै हो भनेर बताए ।
त्यसैले घटनामा मनिताको संलग्नता खासै नदेखिएपछि प्रहरीले अनुसन्धानको दायरामा भने ल्याएको छ ।
