प्रेमिकाको ट्याटु खोप्दा एचआईभी, जो वीर अस्पतालमा जीवनसँग अन्तिम लडाइँ लड्दैछन्
आफ्नो प्रेमिकाको प्रेममा भुतुक्कै भएर छातीमा ट्याटु खोपेका एक युवक अहिले वीर अस्पतालमा जीवन मरणको दोसाँधमा छन् । उनीसँग न त अहिले आफ्नी प्रेमिका छिन्, न त जीवन बाँच्ने आधार । उनी एचआईभी पीडित हुन् । न त बोल्न सक्छन्, न त चल्न सक्छन् ।
वीर अस्पतालमै कार्यरत एक नर्सका अनुसार चार वर्ष ती युवक एक युवतीको प्रेममा परे । दुवैजना भागेर बिहे गर्ने र विदेश पलायनको सोच बनाउन थाले । तर, ती युवकले सोचे जस्तो भएन । युवती अर्कै युवासँग विदेश उडिन् ।
यता, ती युवक भने युवतीको प्रेममा डुब्न थाले । उनले प्रेमिकालाई बिर्सन सकेनन् । र, आफ्नो छातीमा ती युवतीको ट्याटु खोपे । ट्याटु खोपेको केही महिनापछि उनलाई लगातार ज्वरो आउन थाल्यो । परिवारले उनलाई चेकअप गराउन अस्पताल लगे । रगत परीक्षण गर्दा उनमा एचआईभी पोजेटिभ देखियो । यो खबर सुन्नेवित्तिकै उनको होसहवास उड्यो ।
ट्याटु खोप्दा उनलाई एचआईभी सरेको रहेछ । परिवारमा सन्नाटा छायो । घरको एक्लो छोरा । आमाबाबु निकै पीडामा परे । केही समयपछि उनी विरामी परे । उनलाई परिवारले दुई महिनासम्म नर्भिक अस्पतालमा उपचार गराए ।
ती युवकमा ईमेनेन्जाइटिसले ग्रसित बनाइसकेको रहेछ । त्यसपछि न उनी बोल्न सक्न सक्ने भए न त चल्न सक्ने नै भए । शरीर पूरै अपांगता । अहिले उनी वीर अस्पतालमा जीवनको अन्तिम लडाइँ लडिरहेका छन् ।
यो घटनाले आवेश र रहरै रहरमा चाँडै कुनै निर्णय गर्नु हुँदैन र ट्याटु खोपाउँदा निकै ध्यान दिनुपर्ने सन्देश दिएको छ । राजधानीमा पछिल्लो समय ट्याटु खोप्ने संस्कृति बढेको छ । तर, त्यसले कतिलाई विभिन्न रोगबाट संक्रमित बनाइरहेको छ भन्ने खुल्न सकेको छैन ।
