ज्योतिसँगको विवाद र रोचक कुराहरु आस्था राउतको (१९ तस्बिरसहित)

 

आस्था राउतको बारेमा कति बयान गरिरहनु ? आवाजमा उनको छुट्टै जादु छ । उनि स्टेजमा उक्लिएपछि दर्शक हेरेको हरै हुन्छन् ।

उनको प्रस्तुतीमा खुलेरै मनोरन्जन लिन्छन् । दर्जनौं लोकप्रिय गीत दिइसकेकी

गायिका राउत संसारका धेरै देशमा पुगेर नेपाली मनलाई मनोरन्जन दिएकी छिन् । कामको ब्यस्तताका कारण नेपालमा पनि एकदिन घरमा बस्ने फुर्सद छैन् ।

पुर्व देखी पश्चिम र उत्तरदेखी दक्षिणसम्म पुगिसकेकी गायिका राउतले लामो साँगितिक करिअरमा विभिन्न अनुभव सम्हालेकी छिन् । दर्शकको मायाँ त मज्जाले पाइरहेकी छिन्, बेला–बेलामा आयोजकवाट पाउनुपर्ने सम्मान र पारिश्रमिक नपाउँदा दुःखी पनि छिन् । त्यस्तै भएको छ, अहिले उनलाई ।

बाँकी तस्बिरहरु समाचारको अन्तिममा छन्

बाँकी तस्बिरहरु समाचारको अन्तिममा छन्

हालै उनले आफ्नो फेसबुकमा स्ट्याटस राख्दै २०७५ सालमा विदेशमा गरिएका कार्यक्रमबाट पुरा पारिश्रमिक नपाएको गुनासो गरेकी छिन् । उनले आयोजकलाई पुरा रकम नदिए नाम सार्वजनिक गर्ने धम्की समेत दिएकी छिन् । उनले भनेकी छिन्, ‘२०७५ मा विदेशमा गरेको कामको जति म्यासेज गर्दा पनि पुरा रकम नदिने अर्गनाईजरहरुको नामहरु चाँडै सार्वजनिक हुँदै ।’ आखिर आस्थाले कुन–कुन कार्यक्रमबाट रकम पाएकी छैनन् ? कति रकम लिन बाकी छ ?

यसो भन्छिन् आस्था

नमस्ते, अहिलेसम्म जिवनमा जे जति कमाइएको छ त्यसमा कहिल्यै असन्तुष्टि छैन । नाम छ, कमाई पनि राम्रो छ । तर, कहिलेकाहि कतिपय आयोजकहरुले मन दुखाउनुभएको छ । पुरा रकम दिनुभयो भने कार्यक्रममा आउँछु भनेर धेरैपटक भनेको छु । तर ठग्नेहरुले जसरी पनि ठग्दारहेछन् । स्टेज चढिदिनुस्, झरेपछि दिन्छौं भन्नुहुन्छ । तर, झरिसकेपछि नपाएका धेरै रेकर्ड छन् । मैले पछिल्लो समय विदेशका केहि कार्यक्रम र नेपालका धेरै कार्यक्रमबाट रकम लिन बाँकी छ । कलाकारहरु बाँच्ने भनेकै स्टेज कार्यक्रमवाट हो, त्यहि स्टेजवाट कमाएको रकम पनि नपाएपछि के हुन्छ ? त्यो जसले पनि अनुमान गर्न सक्छ । कार्यक्रममा नपुग्दासम्म खुट्टा ढोग्नेहरु त्यसपछि न फोन उठाउने, न म्यासेजको रिप्लाई गर्ने गर्नुहुन्छ । अब कलाकारहरुको पसिना र खुन चुस्न खोज्नेहरुलाई ठिक पार्नुपर्छ ।

बाँकी तस्बिरहरु समाचारको अन्तिममा छन्

पृथक् स्वर । फरक धारका गीत । बोल्ड प्रस्तुति । दर्शकलाई उफार्न सक्ने आफ्नै शैली । पछिल्लो पुस्ताकी लोकप्रिय गायिका आस्था जब स्टेजमा उत्रिन्छन् सबैले एकसाथ उनलाई साथ दिन्छन् —गीत गाएर । ताली बजाएर । केही साताअघि काठमाडौंको एक कार्यक्रममा आफ्नो प्रस्तुति दिने क्रममा आस्था गाउँदै थिइन्, ‘खै त मलाई झुम्के बुलाकी…’

दर्शकले उनीसँगसँगै गीत गाउँदै साथ दिए । चिच्याउन थाले । पररररर ताली बजाउन थाले ।
उनको प्रस्तुति अझै बोल्ड बन्यो ।

प्रायः सबै स्टेजमा आफ्नो ‘पावरफुल’ प्रस्तुति दिने आस्था राउतका प्रशंसक कम छैनन् । गीतमा छोरीको भाकालाई स्थान दिएपनि स्टेजमा उनलाई पुरुष फ्यानले पनि उस्तै साथ दिन्छन् ।

जब उनले स्टेजमा आफ्ना गीतहरूको प्रस्तुति दिन थाल्छिन्, तब उनलाई सबैभन्दा रमाइलो लाग्छ । उनी भन्छिन्, ‘मेरो सबैभन्दा प्यारो गीत भन्ने नै झम्के बुलाकी हो ।’ आफैंलाई मन परेको गीत भएकाले भिडियो गर्दा पनि उनी यही गीत रोजिन् । जुन गीतले उनलाई अझै लोकप्रिय बनायो ।

उसो त ‘मलाई नेपाली होइन भन्न कहाँ पाइन्छ ? म त नेपालको माया गर्ने छोरी मलाई मजस्तै माया चाहिन्छ’ भन्ने गीतले उनको लोकप्रियता चुलियो ।

‘छोरीलाई पढाउन भन्दा पनि बिहे गरेर छोराछोरीलाई पठाउन समाज आतुर हुन्छ । बिहे गर्न हतार गर्नु हुँदैन । छोरीलाई पनि समान अधिकार दिनुपर्छ भन्ने भावलाई झुम्के बुलाकीमा उठान गरिएको छ’, उनी भन्छिन् ।

सानैदेखि उनलाई गीत गाउने आदत थियो । परिवार नै संगीतमय थियो ।

आमा (सावित्री राउत) ले गीत लेख्नुहुन्थ्यो । बुवा (हरिबहादुर राउत)ले पहिलेदेखि नै लोकगीत गाउनुहुन्थ्यो । उनी तीन वर्षको हुँदादेखि नै स्टेजमा गएर गीत गाउँथिन् । स्कूलमा सबैले खुबै माया गर्थे । गीतले विद्यालय परिसरमा मात्र वाह ! पाएकी थिइनन् उनले । चिन्नेजति सबैकी प्यारी बनेकी थिइन् ।

पुर्ख्यौली घर दोलखाको चरिकोट भएपनि उनको परिवार काठमाडौं बसाइ स–यो । काठमाडौंको बानेश्वरमा जन्मिन् र यतै हुर्किन् । ‘म आफूलाई भाग्यमानी मान्छु, मैले परिवारबाट सधैंभरि ठूलो साथ र सहयोग पाएँ,’ उनी आफ्नो बाल्यकाल स्मरण गर्दै भन्छिन्, ‘तीन वर्षमा नै मैले स्टेजमा कार्यक्रम गरेकी थिएँ रे !’

सानैदेखि अतिरिक्त क्रियाकलापमा सधैं अगाडि भएपनि उनको पढाइ भन्ने औसत थियो । ‘गाउने, नाच्ने र खेल्नेमा त म झनै अगाडि थिएँ । पढाइमा म कहिल्यै टप हुन सकिनँ,’ उनी लामो हाँसो हाँस्दै भन्छिन्, ‘भोलिको कुनै योजना थिएन । अतिरिक्त क्रियाकलाप गर्न पनि परिवारको साथ पाएकी थिएँ ।’

छोरालाई पढ्ने पाठशाला छोरीलाई घाँसे पाखाभीर
मान्छे किन यति निठुरी लौ न आमा लाग्यो मलाई पीर

कक्षा ६ मा पढ्दा रेकर्ड भएको यो बालगीत उनको पहिलो गीत थियो । सानैदेखि गीत गाउनमा अब्बल राउतका लागि यो एउटा मौका पनि थियो । उनी भन्छिन्, ‘गीत रेकर्डपछि धेरैले प्रतिक्रिया पनि दिनुभएको थियो ।’

नयाँ बानेश्वरमा मामाघर पनि थियो । त्यसैले उनलाई धेरैले ‘बानेश्वरकी आस्था भान्जी’ भन्ने गर्थे । गीत गाउँदै जाँदा उनलाई बानेश्वरले मात्र हैन, कुनाकुनाका नेपालीले पनि चिन्न थाले । ‘देशव्यापी भएको गायक प्रतियोगितामा म दुईपटक दोस्रो र काठमाडौंव्यापी भएको प्रतियोगितामा लगातार तीनपटक प्रथम भएकी थिएँ,’ उनी भन्छिन्, ‘केहीले त मलाई त्यतिबेला नै चिनिसक्नुभएको थियो रेडियो नेपालबाट – मिलन विद्या मन्दिर, अनामनगरकी आस्था राउत भनेर उद्घोष गर्दा ।’

व्यावसायिक रूपमा ‘सालको पात टपरी…’ गाएपछि भने उनको व्यावसायिक गीतीयात्रा शुरु भयो । उनको गीतले युवापुस्तामा चर्चा पनि पायो । चलचित्रमा गाएका गीतहरूले चर्चा बटुले । लगत्तै उनले आफ्नो एल्बम ‘आधार’ बजारमा ल्याइन् । एल्बममा संग्रहित प्रायः गीत दर्शकले रुचाए ।

त्यसपछि त प्रशस्त स्टेज कार्यक्रमका प्रस्ताव आउन थाले उनलाई । आस्था राउतलाई नचिनेकाले पनि बिस्तारै चिन्न थाले ।

‘म बगिरहने खोला हो । बाढी पहिरो होइन । एकनासले बगिरहन्छु,’ पछिल्लो समय नयाँ गीत बजारमा नल्याएकी आस्था भन्छिन्, ‘म त्यस्तो हा हु गीत गाएर बजारमा आउन चाहन्नँ । मन परे गाउने हो । नपरे गाउँदिनँ ।’

नेपाली संगीतमा अश्लीलताले प्रभाव पार्दै गएकोमा राउतको असन्तुष्टि छ । ‘मैले गीत गाउनुभन्दा पहिले आमालाई देखाउने गर्छु । उहाँले गाऊ भन्नुभयो भने मात्र गाउने हो,’ उनी भन्छिन्, ‘म अश्लील गीत गाउँदिनँ । आस्था राउतको आफ्नै स्वभाव छ । ब्राण्ड छ ।’

कतिपयले उनलाई मूडी र जिद्दी पनि भन्ने गर्छन् । कसैले अटेरी र घमण्डी छे पनि भन्ने गर्छन् । तर उनी भने अरूले बुझेजस्तो आफू नभएको बताउँछिन् । ‘म सहीलाई सही र गलतलाई गलत भन्ने गर्छु । त्यसैले मलाई यसरी मूल्यांकन गरिएको हुनसक्छ,’ उनी भन्छिन्, ‘तर मलाई बुझ्नेले ओहो ! आस्था कति ठीक रैछ पनि भन्नुहुन्छ ।’

आफूले गाउन अस्वीकार गरेका कतिपय गीत चर्चित भएको उनी बताउँछिन् । गीत नगाउनुको कारण चित्त नबुझेर मात्र होइन । कतिपयसँग त पारिश्रमिकसँग पनि उनको चित्त बुझ्दैन ।

उनी भन्छिन्, ‘लाखौं, करोडौं खर्च गरेर फिल्म बनाउनुहुन्छ । तर फिल्ममा गीत गाउनेलाई २०–२५ हजार दिन दाँतबाट पसिना निकाल्नुहुन्छ,’ उनी भन्छिन्, ‘नेपालमा कलाकारलाई जे भनेपनि हुन्छ, जस्तो व्यवहार गरेपनि हुने भन्ने प्रवृत्ति हावी भएको छ ।’

‘कलाकार राष्ट्रका गहना हुन् त भनिन्छ तर हामीलाई सुनभन्दा कम छैन, हराएमा डर छैन भन्ने खालको गहना बनाइयो ।’ उनी देशको नीति बनाउने नेताप्रति पनि आक्रोश पोख्छिन् ।

तर दर्शकसँग भने उनको कुनै गुनासो छैन । ‘दर्शकले त हामीलाई माया गर्नुहुन्छ नि,’ उनी थप्छिन्, ‘दुःख त म्यानेजमेन्टसँग लाग्छ, गीतमा साउण्ड सिस्टम, पारिश्रमिक केही पनि चित्तबुझ्दो हुँदैन ।’

‘यो देशमा सबै स्वार्थी हुँदै गएका छौं । नेपालमा स्वार्थीपना यति हावी छ कि देश बनाउने भन्नेहरू नै स्वार्थको लेपमा जेलिएका छन् । यस्तो पाराले नेपाली कलाक्षेत्र मात्र होइन, कुनै पनि क्षेत्र अगाडि बढ्न सकेको छैन,’ उनी थप्छिन्, ‘यहाँ मन्दिर, मस्जिद, चर्च बनाएर केही हुनेवाला छैन । भगवान खुशी तब हुन्छन्, जब हामीले गरीब दुःखीलाई सहयोग गर्छौं ।’

उनी भन्छिन्, ‘हुन त पूरै विश्व स्वार्थी छ तर मान्छे झनै स्वार्थी भएका छन् ।’

प्रायः गीतमा चेलीको कुरालाई उठान गरेकी राउत आफू गाउनकै लागि जन्मेको ठान्छिन् । आफूले सधैं ‘स्तरीय’ गीतमा ध्यान दिने बताउने राउतले शहरिया जिन्दगी भोगेपनि गाउँको जिन्दगीलाई राम्रोसँग बुझेको बताउँछिन् ।

छिट्टै नै आफ्नो एल्बम ‘आधार २’ निकाल्ने तयारीमा रहेकी राउत पछिल्लो गीतमा पनि समसामयिक विषयवस्तुका गीत निकाल्न थालेको बताउँछिन् ।

‘समय मिलाउन अलिक गाह्रो भइरहेको छ । छिट्टै नै नयाँ एल्बम निकाल्ने तयारीमा छु । केही गीत रेकर्ड पनि भएका छन् । गीतले समाज परिवर्तनको आवाज बोल्नेछ,’ उनी सुनाउँछिन् ।

सम्मान गर्ने आयोजकप्रती मेरो धेरै सम्मान छ र सुभचिन्तकहरुमा सधै साथ र सर्पोटका लागी धन्यवाद् दिन चाहन्छु ।

आस्था राउतको मनपर्ने कुराहरुः

चलचित्र : क्याराभान

बाल्यकालमै हेरेको यो चलचित्र मेरो मनमै गढेको छ। नेपाल कति सुन्दर छ भन्ने कुरा यो चलचित्रले वर्णन गरेको छ। चौंरीगाई भीरबाट झरेको दृश्य हेर्दा म रोएकी थिएँ।

नाटक : कोर्टमार्शल

अहिलेसम्म हेरेका नाटकहरूमध्ये यसले मेरो मन छोयो। १ घण्टा ४५ मिनेटसम्म दर्शकलाई बाँधेर राख्न सक्ने यो नाटकमा कलाकारहरूले पनि उत्कृष्ट अभिनय गरेका छन्।

अभिनेता: मह जोडी

उहाँहरूको अभिनय मात्र होइन, व्यक्तित्व र सेन्स अफ ह्युमर पनि उत्कृष्ट छ। प्राकृतिक रूपमै दर्शकलाई हँसाउन सक्ने क्षमता पनि यो जोडीमा छ।

अभिनेत्री: गौरी मल्ल

जस्तो भूमिकामा पनि सहज अभिनय गर्न सक्ने क्षमताले मात्र होइन सुन्दरताका दृष्टिकोणले पनि उहाँ अब्बल हुनुहुन्छ।

संगीतकार: सुरेश अधिकारी

उहाँको संगीत पर्फेक्ट लाग्छ। मैले पनि उहाँका गीत गाउने अवसर पाएकी छु। मेलोडीलाई टपक्क टिपेर कर्ण्प्रिय गीत तयार पार्न सिपालु हुनुहुन्छ।

गायक: स्व.गोपाल योञ्जन

गीत गाउने शैली नै आकर्षक लाग्छ। मेरो बुवाले उहाँको ’निशानी’ एल्बम घरमा ल्याउँदा म सानै थिएँ। त्यो उमेरमा पनि मैले उक्त एल्बमका गीत पटक(पटक सुन्दा क्यासेट प्लेयर नै बिग्रिएको थियो।

गायिका: स्व.अरुणा लामा

उहाँको त स्वर नै मार्मिक छ। जुन गीत सुने पनि भावनामा डुब्न बाध्य पार्ने एक मात्र गायिका।

खाना : दाल भात तरकारी

मलाई सादा नेपाली खाना मन पर्छ, त्यो पनि मेरी मामुले पकाएको !

पहिरन: क्याजुअल

लगाउन सजिलो र शरीरलाई सुहाउने मात्र होइन, स्कुटीमा हिँड्दा पनि क्याजुअल पहिरन उत्तिकै सहज हुन्छ।

मौसम: जाडो

म फेसनेबल ओभरकोट र लेदरको ज्याकेटकी पारखी हुँ। यी पहिरन लगाउने भनेकै जाडोमा त हो नि !

ज्योतिसँगको वादविवाद

नेपाली संगीतमा गायिका आस्था राउत र ज्योति मगरका फरक–फरक छवि छन् । आस्था शालीनता र बौद्धिकताका लागि चिनिन्छिन् भने ज्योति छाडापन र उछृङ्खलताका लागि चर्चित छिन् । देश तथा विदेशमा हुने कार्यक्रमहरुमा दुवै गायिकाको राम्रै डिमान्ड छ ।

हालै आस्थाले फेसबुकमा एउटा गम्भीर मुद्दा उठाइन् । धारावाहिक रुपमा स्टाटस लेखेर उनले मेला–महोत्सवमा देखिएको अश्लिलतामाथि प्रहार गरिन् । आस्थाले पहिलो स्टाटस लेखेकी थिइन्, ‘कति स्वरका धनी चेलीहरु घरमै बस्नु र्पयाछ, अश्लिल कुराहरु र नांगो नाच गर्नेहरु महोत्सवहरुमा बिकेका छन् ।’

त्यसपछि उनले अर्को स्टाटस लेखिन्, ‘कला र चर्तिकला छुट्याउने संगीत निकायको सेन्सर बोर्ड कहाँ छ ? गुहार मागेको अवस्था ।’ आस्थाले आफ्ना स्टाटसमा कसैको नाम उल्लेख त गरेकी थिइनन्, तर चोट र्पयो ज्योति मगरलाई ।

आस्थाले आफूजस्ता गायिकाहरुलाई नै दनक दिएको बुझेर ज्योतिले फेसबुकमै लामो जवाफ फर्काइन् । स्टाटसमा उनले महिलाले आफ्नो इच्छाअनुसार लगाउन, खान, हिँड्न पाउनुपर्ने उल्लेख गरेकी छिन् । साथै कपडा र संगीतको सम्बन्ध नहुने भन्दै कपडाको नाप र लम्बाइको निर्णय व्यक्तिको स्वतन्त्रताभित्र पर्ने तर्क गरेकी छिन् ।

ज्योतिको जवाफी स्टाटस आएपछि आस्थाले फेरि लेखिन्, ‘चोरको खुट्टा काट्भन्दा उचाल्यौ प्यारी, के गर्छौं हेर, गलतलाई गलत र सहीलाई सही त भन्नैर्पयो । कसैको वास्तविक जीवनमा मेल खाएमा त्यो संयोग मात्रै हुनेछ है, दुख नमाने । उही तिम्रो शुभचिन्तक ।’

दुवै गायिकाहरु एक–अर्कासँग राम्ररी परिचित छन् । उनीहरुले दुईपटक एउटै स्टेजमा गाएका पनि छन् । तर पछिल्लो समयमा ज्योतीले गाउने कार्यक्रममा आस्था सकभर सहभागी हुन्नन् । दुवै गायिकासँग यस प्रकरणमा भएको कुराकानी । दुवैले आ–आफ्नो विचारको लामो व्याख्यान गरे । प्रस्तुत छ कुराकानीको संक्षिप्त अंशः

तपाईंले कसलाई टार्गेट गरेर स्टाटस लेख्नुभएको हो ?

मैले कसैलाई मेन्सन गरेकी छैन । यस्ता गायक–गायिका बग्रेल्ती छन् । उनीहरुको ठूलै झुण्ड छ ।

ज्योती मगरले दिएको जवाफ कस्तो लाग्यो ?

मैले उनलाई मात्रै इंगित गरेको थिइनँ । तर चोरको खुट्टा काट् भन्दा खुट्टा उचालेझैं गरिन् । यमसा मेरो भन्नु केही छैन ।

यो विषयमा किन बोल्न आवश्यक ठान्नुभयो ?

अति नै भयो नि त । तपाईं आफैं भन्नुस त, गाउँ–गाउँमा हुने मेला–महोत्सवमा युवाहरु मात्रै आएका हुँदैनन् । बालकदेखि वृद्धसम्म आएका हुन्छन् । स्टेजमा गायिकाले छाडा कुरा गर्दा, शरीरका गोप्य अंग देखाउँदा उनीहरुमा कस्तो असर पर्छ ? बच्चाहरुले के सिक्छन् ? बृद्धबृद्धताहरुले के सोच्छन् । महिला दिदीबहिनीहरुलाई कस्तो लाग्छ ? महिला शशक्तिकरण भनेको नांगो नाच देखाउनु हो त ? उनीहरुले गर्दा हामीजस्ता गायक–गायिकालाई पनि अप्ठेरो पर्ने स्थिति आयो । त्यसैले मुख खोलेँ ।

तपाईंले स्टेजमा आफ्नो डिमान्ड कम भएर अरुमाथि तुष पोखेको त होइन ?

कसले भन्यो स्टेजमा मेरो डिमान्ड कम भयो भनेर ? म अहिले पनि उत्तिकै व्यस्त छु ,। बढी डिमान्ड हुने गायिकाभित्रै पर्छु । तर, म जहाँ पायो त्यहाँ गाउँदिन । टिममा अरु कस्ता गायिकाहरु छन् भन्ने हेरेर मात्रै निर्णय लिन्छु । जो पायो त्यहीसँग स्टेज सेयर गर्दिनँ । देखाउने नै हो भने त मेरो ज्यान पनि कम छैन नि ।

मलाई आफूलाई अफर आएको आधा गीत पनि गाएको छैन । म शब्द–शब्द केलाएर मात्रै गीत गाउँछु । छाडा र द्विअर्थी शब्द भएका गीतहरु ठाडै रिजेक्ट गरिदिन्छु । शब्द चित्त नबुझेरै थुप्रै आइटम गीतहरु गाइनँ । म हिट हुनकै लागि गाउने सोच राख्दिनँ ।

तपाईंको आरोप महिला कलाकारप्रति मात्रै कि पुरुषप्रति पनि हो ?

दुवैलाई हो । महिलामा विकृति बढी छ । तर, पुरुष पनि कम छैनन् । अहिले आएका दोहोरी गीतहरु कतिपय सुन्नै नसकिने छन् । धेरै दोहोरी गीत सेक्स ओरियन्टेड हुन्छन् । लोक दोहोरी भनेको त हाम्रो संस्कृति पो हो त । यसलाई पनि विकृत र्पायौं भने हामीसँग के रह्यो ?

गायिकाले स्टेजमा गाउँदा लगाउने लुगामा पनि तपाईंको आपत्ति हो ?

गायिकाले स्टेजमा गुन्यूचोली नै लगाएर गाउनुपर्छ भन्ने मेरो मान्यता होइन । तर, उनीहरुले लगाएको लुगा समाजलाई पाच्य हुनुपर्छ । गायिकाहरुले आफ्नो गायन कला पो देखाउने हो, स्तन, तिघ्रा देखाउन किन र्पयो ?

यो विकृतिको समाधान के हुन सक्छ त ?

अधिकांश महोत्सवहरु उद्योग–वाणिज्य संघहरुले गरेका हुन्छन् । अहिले उद्योग–वाणिज्य महासंघको नेतृत्वमा महिला हुनुहुन्छ सायद । उहाँले पहलकदमी लिनुपर्छ । समाज विगार्ने खालका कलाकारहरुलाई प्रश्रय दिन छोड्नुपर्छ ।

महोत्सव भनेको समाज बनाउनलाई हो बिगार्नलाई होइन । साथै, अब संगीतमा पनि सेन्सरबोर्ड आवश्यक भएको छ । शब्दहरुको मूल्यांकन गरेर मात्रै रेकर्ड गर्न अनुमति दिनुपर्छ । अर्को कुरा, कलाकारहरुको पनि ग्रेडिङ हुनुर्पयो । छाडा गीत गाउनेहरु र अरु कलाकारहरुलाई एउटै कसीमा राखिनु भएन । यो काम सरकारले गर्नुपर्याे ।

ज्योति मगरः द्विअर्थि कुरा त बोल्नैर्पयो नि !

आस्था राउतले स्टाटसमा तपाईंको नाम त लिनुभएको थिएन, तर तपाईं किन बुरुक्क उफ्रिनुभयो ?

म उफ्रिएको होइन, आफूलाई सभ्य भनाउँदाहरुलाई जवाफ दिएको हो । मैले पनि उनको नाम लिएको छैन ।

तर, तपाईंजस्ता गायिकाहरुले समाजमा विकृति फैलाइरहनु भएको छ भन्ने सोच्नेहरु त अरु पनि धेरै छन् नि ?

केलाई विकृति भन्ने ? हामी आफ्नो प्याट्रनमा गाउँछौं, उनीहरु आफ्नो प्याट्रनमा गाउँछिन् । हाम्रो प्याट्रन चैं विकृति उनको चैं संस्कृति ?

अर्को कुरा, हामी गायिकाहरुलाई मात्र किन आरोप लाग्छ ? पुरुषहरु कम छाडा छन् ? उनीहरुले गाएका गीत सुन्नुभएको छ ? हाल्ने, ठोक्ने, झार्ने जस्ता कुराहरु हुन्छन् । हामीले त कम्तीमा दोहोरो अर्थ लाग्ने शब्दहरु बोल्छौं, उहाँहरु त ठाडै बोल्नुहुन्छ । उहाँहरुले कम्मरमाथि लुगा फुकालेर गाउँदा कुनै प्रश्न उठ्दैन । हामीले ब्रा खोलेर नांगै त भएका छैनौ नि !

महोत्सवहरुमा तपाईंहरुले छाडापन फैलाइरहनु भएको छ भन्ने उहाँको आरोप सत्य नै होइन र ?

दर्शकहरुले जुन कुरालाई मन पराइरहनु भएको छ, जुन कुरा हेर्न पैसा तिरेर आइरहनु भएको छ, त्यसलाई छाडापन भन्ने उनी को हो ? तपाईं को हो ? दर्शकले मन पराएपछि सक्कियो ।

हाम्रो मालिक भने पनि भगवान भने पनि दर्शक–स्रोता नै हो । उहाँहरुले जे डिमान्ड गर्नुहुन्छ हामीले त्यही दिने हो । हामीसँग जे छ त्यही देखाउने हो । जसको छाति सानो छ उसले के देखाउँछ ?

भनेपछि आफ्नो शरीरप्रति ठूलै घमन्ड छ ?

मेरो शरीर हेर्नलाई सात घन्टा हिँडेर आउनु हुन्छ, मैले किन घमन्ड नगर्ने ?

तर, यूट्यूबतिर तपाईंमाथि कस्ता–कस्ता कमेन्ट आउँछन् हेर्नुभएको होला नि ? जस्ता कमेन्ट आए पनि मलाई मतलब छैन । मेरो आफ्नो फ्यान फलोइङ छ । म उहाँहरुका लागि गाउँछु । यूट्यूबमा अघाउँञ्जेल गीत हेरेर गाली गर्नेहरु महिला शशक्तिकरणका विरोधी हुन् ।

तपाईं स्टेजमा पुरा लुगा लगाएर सभ्य रुपमा प्रस्तुत हुनुभयो भने तपाईंका फ्यानहरु निराश हुन्छन् हो ?

हुँदैनन् । मैले सभ्य रुपमा पनि गाएकी छु । गुन्यू चोलो लगाएर पनि गाएकी छु । सिचुएसन हेरेर गाउँछु । दर्शकलाई उचाल्नुपर्ने भयो भनि द्विअर्थी कुरा त बोल्नैपर्याे नि ।