को हुन् ? पटक–पटक तपाईसँग माफ माग्ने यी दुई महिला
माफी दिनुस् या नदिनुस् तर तपाईसँग दिनदिनै कसैले माफ मागिरहेको हुन्छ । अरु केही शब्द बोल्दैनन् केवल माफ माग्छ र आफ्नो वाक्य टुंग्याउँछ ।
नेपाल टेलिकम वा एनसेलमा फोन नलाग्दा तपाईसँग बारबार माफ माग्ने यी दुई महिला हुन्– भूमिका थापा शाह र सुबानी मोक्तान ।
फोन व्यस्त हुँदा, अरू कुनै कारणले सम्पर्क हुन नसक्दा वा अरू जानकारी अथवा सेवा लिन खोज्दा फोनमा महिलाको स्वर आफैँ बज्छ । यान्त्रिक रूपमा बज्ने त्यो सुनेर प्रयोगकर्ताहरू झर्को पनि मान्छन् । तपाईँले फोनमा सुनिरहने आवाज उनीहरुको नै हो ।
नेपाल टेलिकमका सेवाका लागि भूमिका थापा शाहको र एनसेलका लागि सुबानी मोक्तानले आफ्नो स्वर दिएका छन् । भूमिकाले पहिला रेडियो तथा टेलिभिजनमा कार्यक्रम प्रस्तुत गर्ने गरेकी थिइन् भने सुबानी गायिका हुन् ।
‘फोन नलागेको बेलामा मेरै आवाज आउँछ, टेलिकम सम्बन्धी केही सूचना लिनुपर्ने भयो मैरै आवाज आउँछ । कतिपय अवस्थामा मेरो आवाज सुन्दा कतिजना दिक्क हुनुभएको हुन्छ’, भुमिका भन्छिन्, ‘मैरै आमा पनि कहिले काहीँ भुमिका जी फोन लगाईदिनुहोस् न भनेर जिस्किनु हुन्छ मलाई मज्जा लाग्छ ।’
कहिले काहीँ आफुले फोन गर्दा आफ्नै आवाज सुन्दा आफैलाई वाक्क लाग्ने गरेको भुमिकाको अनुभव छ ।
‘कहिले काँही म आफैपनि दिक्क भाको हुन्छु । सायद सबैलाई त्यस्तै हुन्छ होला । कहिले काँही आफैले कसैलाई फोन गर्दा आफ्नो आवाज सुन्दा वा इन्ट्रक्सन दिएको सुन्दा रममाइलो पनि लाग्छ तर नकाटेसम्म त्यही बजेको बजै गर्दा भने दिक्क नै लाग्छ’, सुबानी आफ्नै अनुभव सुनाउछिन् । –श्रोत बीबीसी
