ठुलो परिमाणको लागु औषध सहित ३ जना पक्राउ
धादिङ, गजुरी गाउँपालिका(७ पेटारे बस्ने ४५ वर्षीया सुकमाया तामाङलाई अवैध लागूऔषध चरेश १ सय १०.८९ केजी, चरेश बनाउने तयारी धुलो ३२.९१ केजी, गाँजा मिसिएको धुलो ३ सय ९०.३२ केजी र गाँजाको गेडा सहितको धुलो १ सय ९ केजी सहित बिहीबार राति प्रहरीले पक्राउ गरेको छ ।
लागूऔषध नियन्त्रण व्यूरो र ईलाका प्रहरी कार्यालय गजुरीबाट संयुक्त रुपमा खटिएको प्रहरी टोलीले तामाङलाई घरगोठमा लुकाई छिपाइ राखेको उक्त परिमाणको लागूऔषध सहित फेला पारी पक्राउ गरेको हो ।
सुनसरी, धरान उपमहानगरपालिका १५ बस्ने हेमराज थापा मगरको घरमा बसिरहेको अवस्थामा सोही उपमहानगरपालिका ३ बस्ने ३८ वर्षीय साङ्गे तामाङलाई नियन्त्रित लागूऔषध लुपिजेसिक ९७ एम्पुल, अभिल ९७ एम्पुल र डाइजेल्याप ९७ एम्पुल सहित बिहीबार दिउसो प्रहरीले पक्राउ गरेको छ ।
साथै धरान उपमहानगरपालिका १५ सेवती खोलाबाट सोही उपमहानगरपालिका ५ देउराली बस्ने १८ वर्षीय अचित राईलाई समेत नियन्त्रित लागूऔषध लुपिजेसिक, एभिल र डाइजेल्याप समेत गरी करिब ९० एम्पुल सहित बिहीबार दिउसो प्रहरीले पक्राउ गरेको छ । दुवै स्थानका अभियुक्तहरुलाई अस्थायी प्रहरी पोष्ट नयाँ बसपार्कबाट खटिएको प्रहरीले फेला पारी पक्राउ गरेको हो । यस सम्बन्धमा स्थानीय प्रहरीले आवश्यक अनुसन्धान गरिरहेको छ ।
