आपराधिक गतिविधिमा संलग्न पक्राउ
आपराधिक घटनामा संलग्न व्यक्तिलाई प्रहरीले विभिन्न स्थानबाट पक्राउ गरेको छ ।
प्रहरी परिसर काठमाडौँ मातहत वृत्तका इलाकामा प्रहरी परिचालन गरी विप्लव समूहका अवान्छित गतिविधिलाई नियन्त्रणका लागि चलाइएको विशेष खोजी अभियानका क्रममा चार व्यक्तिलाई पक्राउ गरिएको परिसरका प्रवक्ता होविन्द्र बोगटीले जानकारी दिनुभयो ।
सामाजिक विकृति, विसङ्गती, गुण्डागर्दीलगायत आपराधिक घटना नियन्त्रण गरी सर्वसाधारणलाई सुरक्षाको प्रत्याभूति दिलाउने उद्देश्यले पछिल्लो समयमा विशेष सर्च अप्रेशन चलाउँदै आएको प्रहरीले जनाएको छ ।
सो क्रममा मङ्गलबार साँझ बालाजुबाट एक थान खुकुरी, फलामको रड र लागुऔषध १३९ एम्पुल डाईजापाम, फेनारगन, नुरफिनसहित मनमैजुका सन्तोष तामाङ र थर नखुलेका अभयलाई पक्राउ गरिएको परिसरले आज एक सूचना जारी गरी जनाएको छ ।
यसैबीच नयाँबसपार्कबाट १६ ग्राम खैरो हेरोइन र खैरो हेरोइन जोख्ने यन्त्र (तराजु) सहित बाँके कोहलपुरका रमेश बस्नेत र शेरसिंह रोकायालाई पक्राउ गरी थप अनुसन्धान थालिएको परिसरले जनाएको छ ।
बौद्ध नागेश्वरी गल्ली र गोकर्णेश्वर नगरपालिका–५ जोरपाटीबाट ४०० लिटर घरेलु मदिरा र मदिरा बनाउन प्रयोग गर्ने कच्चा पदार्थ तीन हजार ३०० लिटर बरामद गरी सोही स्थानमा स्थानीय बासिन्दा, वडा प्रतिनिधि र सञ्चारकर्मीको रोहबरमा नष्ट गरिएको प्रहरीले जनाएको छ ।
