जब एसईई परीक्षामा छात्रा हल भित्रै महिनावारी भईन…
अहिले देशै भरि एसईई परीक्षा चलिरहेको छ ।
पञ्चदेव विनायक नगरपालिका १ कुइकाकी कल्पना रिमाल चैत १० बाट सुरु एसईई परीक्षा दिन ८ गते नै घरबाट निस्किइन् ।
सदरमुकामस्थित विद्या मन्दिर मावि विनायकको उनको परीक्षा केन्द्र परेको छ ।
बिरानो ठाउँ गएर परीक्षा दिँदा कुनै अप्ठ्यारी पर्ने हो कि भन्ने डरले उनलाई सताएको थियो ।
अर्कोतिर बाहिर डेरा गरेर बस्नुपर्ने भएकाले खर्चको समस्या उस्तै थियो ।
कुइकाकै देवसरा अधिकारीलाई बिरानो ठाउँमा अर्काको घरमा बस्नुपर्दा महिनावारी भए कसरी व्यवस्थापन गर्ने भन्ने समस्याले सुरुदेखि नै सताएको थियो ।
आखिर जे डर थियो त्यही भयो ।
‘परीक्षा सुरु भएको १५ मिनेटमै म महिनावारी भएँ ।
प्याड खल्तीमा बोकेरै लगेकी थिएँ ।
तर चिट लुकाउने होला भन्ने आशंका गर्दै शिक्षकले सुरुमै प्याड थुतेर लिए ।’
आफूले त्यो दिन लेख्नै नसकेको देवसराले बताइन् ।
घर छोडेर परिक्षा दिन बाहिर जाँदा सबै भन्दा ठुलो समस्या छात्राहरुलाई महिनावारी हुँदा के गर्ने भन्ने चिन्ताले सताउन थालेको छ ।
