काठमाडौंको बेलिज क्यासिनोमा प्रतिबन्धित नोटको कारोबार
काठमाडौंको मल्ल होटलमा रहेको बेलिज क्यासिनोमा प्रतिबन्धित भारतीय ५ सय र हजारका नोटको कारोबार हुने गरेको खुलेको छ । नेपालीबाहेक विदेशीलाई मात्र प्रवेश अनुमति रहेको क्यासिनोमा प्रतिबन्ध भएका नोट लिएरै क्यासिनो क्वाइन दिइने गरिएको छ । त्यहाँ खेल्न पुगेका एक भारतीय नागरिकले भने,‘नेपालमा ५ सय र हजारका नोट क्यासिनोमा चल्छ, मैले खेलेर आएँ ।’
काठमाडौंमा रहेका क्यासिनोमा अधिकांश भारतीय जुवाडे आउने गरेका छन् । तर, नेपाल राष्ट्र बैंकले समेत प्रतिबन्ध गरेको नोटको कारोबार त्यहाँ रेकीमा बस्ने सुरक्षाकर्मीसँगको सेटिङमा हुने गरेको स्रोतले बतायो । नेपाल राष्ट्र बैंकले त नेपालमा एक सय रूपैंया भारु बाहेक भारतमै चल्तीमा ल्याएको २ हजारको नोट पनि नेपालमा प्रतिबन्ध लगाएको थियो ।
रिजर्भ बैंक अफ इन्डियाले ५ सय र २ हजार भारु नेपालमा खुला भएको घोषणा नगरेसम्म नेपालभर प्रतिबन्ध लगाउने निर्णय राष्ट्र बैंकले गरेको थियो । आरबीआईले सूचना प्रकाशित गरेपछि मात्र नयाँ भारु नोट नेपालमा चलाउने राष्ट्र बैंकले जनाउँदै आएको छ ।
अहिले भारतमै पनि चुनावी सरगर्मी बढेका कारण २ हजारको नोटमा समेत प्रतिबन्धको तयारी भएको छ । यस्तो बेला नेपालको क्यासिनोमा भने यस्ता नोटको कारोबार लाखौंका क्वाइन खरिदविक्रि गरी खेल हुने गरेको छ । भारतले कालोधन र जाली नोट नियन्त्रण गर्न भन्दै १ हजार र ५ सय भारु नोटमाथि प्रतिबन्ध लगाएको थियो ।
