५३ करोड ठगी अभियोगमा गण्डकी मेडिकल कलेजका सीईओ र परीक्षा नियन्त्रक पक्राउ
प्रहरीले गण्डकी मेडिकल कलेजका लगानीकर्तासमेत रहेका पूर्व प्रमुख कार्यकारी अधिकृत (सीइओ) सन्तोष खनाल र परीक्षा नियन्त्रक लक्ष्मण शर्मालाई पक्राउ गरेको छ ।
सरकारले तोकेको शुल्कसीमा विपरीत मनपरी रुपमा विद्यार्थीबाट रकम असुलेको भन्दै परेको उजुरीका आधारमा उनीहरुलाई पक्राउ गरिएको हो ।
उनीहरूसहित कलेजका अन्य सञ्चालक विरुद्ध विद्यार्थीबाट करोडौँ अवैध असुली गरेको भन्दै प्रहरी तथा सम्पत्ति शुद्धीकरण विभागमा छुट्टाछुट्टै उजुरी परेको छ ।
कलेजका तीन विद्यार्थीले मंगलबार जिल्ला प्रहरी कार्यालय कास्कीमा उजुरी दर्ता गरेका थिए । कलेजका एक विद्यार्थीसहित तीनजनाले मंगलबार नै सम्पत्ति शुद्धीकरण विभागमा समेत उजुरी दर्ता गराएका थिए ।
सरकारले उपत्यकाबाहिरको मेडिकल कलेजलाई एमबिबिएसमा ४२ लाख शुल्क तोकेको छ । तर, कलेजले विद्यार्थीबाट उक्त रकमभन्दा १५ लाखसम्म बढी रकम असुलेको विद्यार्थीको आरोप छ ।
कलेज सञ्चालकको मिलेमतोमा कलेजका प्रिन्सिपल, प्रशासकीय अधिकृत, लेखा शाखाका प्रमुख लगायतले विद्यार्थीबाट अवैध रुपमा बढी शुल्क लिएको भन्दै विद्यार्थी लामो समयसम्म आन्दोलनमा छन् ।
