दार्चुला जीप दुर्घटनाः मृतक सबैको सनाखत (नामसहित)
शुक्रबार राती दार्चुला तिङ्कर सडक खण्डको राताकाठामा भएको जीप दुर्घटनामा परी ज्यान गुमाउने सबै ११ जनाको सनाखत भएको छ । शुक्रबार राती घटनास्थलबाट मृतकको शव संकलन गरी जिल्ला अस्पताल दार्चुलामा ल्याईएको जिल्ला प्रहरी कार्यालय दार्चुलाले जनाएको छ ।
जीप दुर्घटनामा परी मृत्यु हुनेहरुमा दुहुँ गाउँपालिकाका ४५ बर्षका कल्यानसिह बडाल, वहाँकै छोरी वर्ष १५ कि निर्मला बडाल, दुहुँ गाउँपालिका वडा नम्बर २ की ३५ बर्षीया परुली धामी रहेका छन् । त्यसैगरी दुहुँ गाउँपालिका १ का ५४ बर्षका धन बहादुर बम, वडा नम्बर ४ दौलाकी ५५ कि अम्मरा बम, सोही ठाउँकी वर्ष ४ की आयुसा बम, वडा नम्बर १ पीपलचौरीकी ४५ बर्षिया गोमती बम र सोही ठाउँकी वर्ष ७१ की धाना बम रहेका छन् ।
त्यस्तै बैतडी जिल्ला दोगडाकेदार गाउँपालिका ६ सित्तडका ६० वर्षीय प्रताप भनिने धनबहादुर चन्द, सोही स्थानकी २०/२१ वर्षीया स्नेहा चन्द र वडा नम्बर १ बस्ने ५३ वर्षीया मानमती भट्ट रहेको जिल्ला प्रहरी कार्यालय दार्चुलाले जनाएको छ । सोही दुर्घटनामा जिप चालक दिपकसिह धामी गम्भीर घाइते भएका छन् । घाइतेको थप उपचारका लागि शुक्रबार राती नै भारतको पीथौरागढ लगिएको छ ।
दुर्घटनामा परी मृत्यु भएका सबैको शनिबार जिल्ला अस्पताल दार्चुलामा पोष्टमार्टम गरी शव आफन्तको जिम्मा लगाइने जिल्ला प्रहरी कार्यालय दार्चुलाका निमित्त प्रहरी प्रमुख रवीन्द्र कठायतले जानकारी दिनुभयो ।
जीप दुर्घटनाको कारण खुल्न सकेको छैन् । दुर्घटना स्थल राताकाठा क्षेत्रमा सडक चौडा गर्ने कार्य भईरहेको छ । तर सो क्षेत्रमा कुनै पनि सवारी साधनहरु सञ्चालनमा रोक लगाइएको थियो ।
